འཇམ་དབྱངས་བླ་མ་ཤེས་རབ་རྒྱལ་མཚན་དཔལ་བཟང་པོ་མཆོག་གི་རྣམ་པར་ཐར་བའི་རྗེས་དྲན་གསུམ།

༄༅། །རྗེ་བཙུན་བླ་མ་དམ་པ་༧འཇམ་དབྱངས་ཤེས་རབ་རྒྱལ་མཚན་དཔལ་བཟང་པོ་མཆོག་གི་

རྣམ་པར་ཐར་བ་མདོ་ཙམ་བརྗོད་པ་ངོ་མཚར་སྤྲིན་གྱི་རོལ་མོ།

གདོད་ནས་ཟད་སར་འཁྱོལ་བའི་ཐུགས་བརྩེ་ཀུན་ལ་མཉམ་ཅིང་། །སྟེང་མ་ལྷ་རུ་མ་འཁྲུངས་གདོང་དམར་བོད་དུ་བལྟམས་པའི། །

རྨ་རྫ་ཟལ་མོའི་སྒང་གི་ངོ་མཚར་ལྷ་ཡི་བུ་ཆུང་། །རྒྱལ་དབང་པདྨ་ཀཱ་རའི་ཞལ་སྐྱེན་འཁྲུལ་མེད་ཡིན་འདུག །

སྨད་ཁམས་ས་ཡི་ཐིག་ལེ་རྨ་ཁོག་ནོར་བུ་གླིང་དུ། །ཁུ་འཕངས་འདབ་མའི་གར་གྱིས་ས་གཞིར་ཡུག་གཅིག་བསྒྱུར་ཅིང་། །

རྦོབ་ཁོག་གཏེར་ལུང་འཛིན་མར་དབྱར་སྐྱེས་རྔ་སྒྲ་སྒྲོག་དུས། །མི་ཕམ་འཇམ་དབྱངས་རྣམ་རྒྱལ་སླར་ཡང་མགོན་དུ་བྱོན་འདུག །

ལོ་ཆུང་ཨ་ལུའི་རྩེད་རར་ཞབས་རྗེས་རྡོ་ལ་བཞག་ཅིང་། །རང་སྡེ་ཡུལ་མིའི་སྐྱིད་སྡུག་མཁྱེན་བརྩེའི་ཀློང་ནས་བརྡོལ་དུས། །

རི་སྡེ་ཕྱི་ནང་བརྒལ་བའི་གྲགས་པ་རིང་དུ་ཁྱབ་སྟེ། །པད་མའི་ཕོ་ཉ་ཞིག་གི་རྟགས་མཚན་ཡང་ཡང་མངོན་འདུག །

དམ་པའི་ལུང་གིས་བསྔགས་ཅིང་རྟེན་འབྲེལ་གནད་གསང་གྲོལ་དུས། །མི་འཇིགས་གདོང་ལྔའི་ཁྲི་འཕང་ཞབས་སེན་ལེགས་པར་འཁོད་དེ། །

གཟུངས་སྤོབས་བློ་གྲོས་རྩལ་གྱིས་ཤེས་བྱའི་མཐའ་རྒྱ་བཅད་ནས། །མཁྱེན་རྟོགས་ཉི་མ་འབར་བའི་གཟི་བྱིན་ལྷག་པར་རྒྱས་འདུག །   

ལས་ཀྱི་མེ་ཏོག་བབས་པའི་མགོན་དེ་ཐོག་མར་ཕྲད་དུས། །ལྷོ་བྲག་གྲོ་བོ་ལུང་གི་མར་པ་ལོ་ཙཱ་མཇལ་བའི། །

མི་ལ་བཞད་པ་རྡོ་རྗེ་སླར་ཡང་ཡིད་ལ་འཁོར་ཞིང་། །དད་འདུན་གསེར་གྱི་སྐ་རགས་ནམ་ཡང་ལྷོད་རྒྱུ་མི་འདུག །

སྐུ་གཞོན་ཕོ་གསར་ཞིག་གི་ན་ཚོད་དར་ལ་བབས་ཏེ། །དལ་འགྲོ་གོམ་པའི་འགྲོས་ཀྱིས་རི་ཆུ་རྐང་བར་གཤུད་དུས། །

ཐོས་བསམ་ཤེད་མོང་རྒྱས་པའི་མཁས་མང་ཆོས་ཀྱི་གྲོང་དུ། །ལུང་རྟོགས་ཉི་ཟླའི་རྣ་ཆ་གང་སྐུའི་རྒྱན་དུ་བཞེས་འདུག །

མཐོ་བ་ནམ་མཁའི་དབྱིངས་སུ་རྒོད་པོ་བྱ་བཞིན་སྐྱོད་པའི། །འཕོ་ཆེན་གྲུབ་པའི་ཁྱུ་མཆོག་དད་པའི་ཡིད་མཁར་བསྟེན་ཏེ། །

རྟོགས་འབུལ་ཞུན་ཐར་གཅོད་དུས་བསྟོད་པའི་དབུགས་དབྱུང་བྱུང་ཞིང་། །བསྟན་འགྲོ་ཐུགས་ལ་དགོངས་ཞེས་རེ་བའི་བཀའ་ཆེམས་བསྩལ་འདུག །

འཐབ་རྩོད་ཡོ་ལང་འཁྲུགས་ཏེ་མི་བསྲུན་ལས་སྦྱོར་རྩོམ་དུས། །དཔའ་མཛངས་རྟུལ་ཕོད་ཆེ་བའི་ཕོ་རབ་སྙིང་ཆེན་ཞིག་དང་། །

གཞུས་པའི་དབྱུག་པ་ཆག་ཅིང་རྡེག་པའི་རྨ་ཤུལ་མེད་པར། །འཛུམ་གྱིས་རྒོལ་ལན་སློག་པའི་གྲུབ་ཐོབ་ངོ་མ་ཡིན་འདུག །

དེ་ལྟར་གཟུ་ལུམ་སྤྲིན་བྲལ་མཁའ་རུ་རྣམ་ཐར་རྒྱུ་སྐར་རླབས་ཕྲེང་གིས། །རྙོག་མེད་ཟོལ་ཟོག་དབྱིངས་སུ་ཡལ་བའི་དྭངས་གསལ་དད་པའི་ཀུན་གསལ་ལ། །

ཁྱེད་སྐུ་ཉི་མ་འབུམ་གྱི་འོད་དང་གསང་གསུམ་ཡོན་ཏན་གདུགས་དཀར་པོ། །མ་འདྲེས་མཇལ་ལ་འདི་ཙམ་བགྱིས་པའི་མཐུན་འགྱུར་གྲོགས་ཀྱིས་ཤིས་པ་བསྙིལ། །

རྨེ་ཡུལ་བྱམས་ཆེན་ཆོས་འཁོར་གླིང་ཞེས་ངེས་དོན་ཆོས་ཀྱི་ཚོང་རྡལ་དུ། །མཁས་གྲུབ་པཎ་ཆེན་འདུས་པ་རྒྱ་མཚོའི་གཙུག་གིས་བཏེགས་པའི་ཅོད་པན་ལ། །

མཆོག་སྤྲུལ་ཉི་མ་གཞོན་ནུའི་བཞིན་རས་སྐལ་བཟང་ཤར་རིའི་རྩེ་མོ་ནས། །མི་རིང་རྫོགས་ལྡན་གསར་བའི་སྐྱ་རེངས་ཀུན་དགའ་སྐྱེད་པའི་དཔལ་འབར་ཤོག །

ཅེས་པ་འདི་བཀའ་དྲིན་ཅན་རྗེ་བཙུན་བླ་མ་དམ་པ་གང་གི་རྣམ་ཐར་ལས་ཅུང་ཙམ་ཁོམ་ཕུབ་སྟེ་རྗེས་སུ་དྲན་པའི་གསལ་འདེབས་ཀྱི་ཚུལ་དུ་

གང་གི་འཁོར་གྱི་གྲལ་མཐར་འཛིན་པ་བསྟན་འཛིན་ལྷུན་འགྲུབ་ཀྱིས་ཡར་ཚེས་བཅུ་གསུམ་གྱི་ཉིན་ལ་བྲིས་པ་དགེ་བར་གྱུར་ཅིག

རྗེས་དྲན་ཀུ་མ་དའི་མཆོད་ཕྲེང་།

མཚན་དཔེའི་འདབ་སྟོང་གེ་སར་གཡོ་བ་ཟླ་ཚེས་གསར་བའི་སྐུ། །དབྱངས་ལྡན་ངག་གི་ཆ་ཤས་ཡོངས་རྫོགས་འགག་མེད་རྡོ་རྗེའི་གསུང་། །

མཁྱེན་རབ་ཆུ་གཏེར་པདྨོ་འཛུམ་པ་མི་ཟད་མཁའ་ཁྱབ་ཐུགས། །དད་གསུམ་སོར་མོའི་སྙིམ་པ་སྦྱར་ཏེ་སྙིང་དབུས་འདབ་བརྒྱར་བསྟེན། །

དཔག་ཡས་མཐའ་བྲལ་ལུང་རྟོགས་དབྱིག་ལྡན་ནོར། །ཁམས་གསུམ་ཟིལ་གནོན་རྣམ་ཐར་ལུང་བྱང་དུ། །

ཤྲཱི་ཛྙ་ན་དྷྭ་ཛའི་མཚན་ལ་སོགས། །ལྷ་ཡི་བཀའ་ལུང་དར་དཀར་སྔོན་ནས་འཐེན། །

བསོད་ནམས་ཆུ་གཏེར་བྱེ་བའི་རྦ་ཀློང་ལས། །པདྨ་གསར་བའི་ལང་ཚོའི་ཕུང་པོ་གང་། །

ཆོ་འཕྲུལ་ཟླ་བར་དབྱར་སྐྱེས་རྔ་དང་ལྷན། །ངོ་མཚར་འཕྲུལ་གྱིས་སྐུ་བཞིའི་ས་བོན་བལྟམས། །

མཚན་མོ་མཁའ་ཡི་རྒྱུ་སྐར་འབུམ་སྡེའི་དབུས། །བསིལ་ཟེར་དྲྭ་བས་གཟི་བྱིན་རབ་འབར་བ། །

མཐོང་ན་མི་མཐུན་མེད་པའི་ལང་ཚོ་ཅན། །ལུས་ཅན་མིག་གི་བདུད་རྩིའི་ཆབ་དེ་དྲན། །

མར་གད་རྒྱན་ལྡན་རིན་ཆེན་རྡུལ་བརྩེགས་པའི། །མི་འཇིགས་སེང་གེའི་བསྣོལ་བའི་ཁྲི་འཕང་རྩེར། །

ལྷར་བཅས་དད་པའི་ཀུ་མད་བཞད་པའི་ཚུལ། །འདྲེན་བྱེད་གཡོ་བའི་གསོས་སུ་སྨིན་པ་དྲན། །

ངུར་སྨྲིག་མཚམས་སྤྲིན་གསར་བའི་རྒྱ་མཚོ་ལས། །ཐོས་བསམ་སྒོམ་པའི་འབྲས་བུ་ཚད་དུ་འཁྱོལ། །

སྡོམ་གསུམ་མེ་ལོང་པདྨའི་སྦུབས་ལྟར་གཙང་། །རྣམ་ཐར་ཆུ་ཤེལ་དཀར་པོའི་འཁྲི་ཤིང་དྲན། །

རབ་འབྱམས་གསང་བའི་མན་ངག་དྲོད་ཚད་བརྙེས། །གང་འདུལ་སྒྱུ་འཕྲུལ་དྲ་བའི་འཇོ་སྒེག་ཅན། །

མི་འཇིགས་སྟོབས་བཅུའི་རྩལ་དང་རབ་འགྲོགས་ཏེ། །མི་ཉམས་དུས་མཐར་སྤེལ་བའི་མགོན་དེ་དྲན། །

མཁའ་ཡི་རྒྱུ་སྐར་ས་ལ་བབས་པ་ལྟར། །དད་པའི་ཆུ་ཀླུང་རྡོལ་བའི་གདུལ་བྱ་ལ། །

ཚངས་པའི་དབྱངས་ཀྱིས་དམ་ཆོས་ཐར་བའི་སྐས། །བག་དྲོ་གཟི་བྱིན་ཐིབས་སེ་གནང་བ་དྲན། །

མི་བསྲུན་འབྱུང་བོའི་རྔམ་ནག་ཤེ་མོང་གིས། །ཕྱེ་མར་འཐག་པའི་འཇིགས་སྣང་བསྐུལ་ཙ་ན། །

ཐོས་འཛིན་རིན་ཆེན་ཁང་བཟང་མ་གཡར་བའི། །ཐང་ལྷོད་ཞུམ་མེད་སེམས་དཔའི་སྙིང་སྟོབས་དྲན། །

རིས་མེད་ཐུབ་བསྟན་ལུང་རྟོགས་རིན་ཆེན་གདུགས། །གླིང་བཞིར་བསྒྲེངས་མཁས་པཎ་ཆེན་བཅུ་བ་དང་། །

ཞབས་ཟུང་འཁོར་ལོ་གཅིག་ཏུ་རབ་བསྒྱུར་ནས། །ལེགས་བཤད་བདུད་རྩིའི་ཟེགས་མ་འཐོར་བ་དྲན། །

ཁྲི་ཤོར་ལྷོ་རུ་ཆོས་ཀྱི་ཐན་པ་ན། །བརྩེ་ཆེན་འོ་མཚོའི་སྤྲིན་དཀར་གཡོ་བ་ལས། །

ཐེག་ཆེན་འོད་གསལ་གསང་བ་སྙིང་ཐིག་གི །མན་ངག་ཟབ་མོའི་སྦྲང་ཆར་ཕབས་པ་དྲན། །

ཉི་ཟླའི་བགྲོད་པ་འགོག་སྙམ་ས་འཛིན་གྱི། །དྲེགས་པ་འཕྲོག་བྱེད་འཛམ་གླིང་ཞི་བདེའི་རྟེན། །

སྐྱེ་འགྲོའི་རྒུད་པ་གསོ་བའི་རྩ་ལག་ཏུ། །བཞེངས་བའི་ཐུགས་བཞེད་མཁའ་ལྟར་ཡངས་དེ་དྲན། །

དབང་ལུང་མན་ངག་དྲིན་གྱི་ཆ་ཤས་ཙམ། །བརྒྱ་བྱིན་མཛོད་ཀྱིས་གཞལ་ཡང་མཚོན་མིན་ཡང་། །

ཞབས་སེན་ལི་ཁྲིའི་མཚམས་སྤྲིན་འཕྱུར་བའི་རྡུལ། །གང་དང་ནམ་ཡང་འབྲལ་མེད་རྒྱུ་རུ་བསྔོ། །

ཞེས་པ་འདི་བཀའ་དྲིན་མཚུངས་བ་མེད་པའི་སྐྱབས་ཀྱི་དམ་པ་གང་གི་བཀའ་འབངས་སྙོམ་ལས་པ་བྱང་ཆུབ་རྒྱལ་མཚན་དུ་འབོད་པས་

སྐུ་ཡི་སྣང་བརྙན་གྱི་ཆ་ཤས་རེ་ཡིད་ལ་ཤར་བ་དང་སྦྲགས་གཟུགས་སྐུའི་བཀོད་པ་ཆོས་དབྱིངས་སུ་བསྡུས་ནས་ལོ་འཁོར་བཅུ་གཅིག་ལོན་པའི་ཆར་བྲིས་པ་དགེའོ། །

࿑ སྐྱབས་རྗེ་བླ་མ་༧ ཐུབ་བསྟན་ལེགས་བཤད་འབྱུང་གནས་སམ་འཇམ་དབྱངས་ཤེས་རབ་རྒྱལ་མཚན་མཆོག་རྗེས་སུ་དྲན་པའི་གཏམ་བདེན་དོན་བདུད་རྩིའི་ཟེགས་མ།

ཆུ་འཛིན་དཀར་པོའི་བ་གམ་མཐོངས་ན་ཏོག་ལྟར་མཛེས་པ་སུམ་རྩེན་ལྟའི། །གངས་དཀར་རི་བོས་ཡོངས་སུ་བསྐོར་བ་བསིལ་ལྗོངས་འཛིན་མའི་ཐིག་ལེ་རུ། །

ཡེ་སངས་རྒྱས་ཀྱང་མི་ཡི་གར་བསྒྱུར་ལྷ་དང་བཅས་པའི་བསོད་ནམས་སུ། །ངོ་མཚར་དབྱར་རྔའི་སྒྲ་དབྱངས་དང་འགྲོགས་མཚན་དཔེའི་པདྨོ་རྣམ་པར་བཞད། །

ཁམས་དབང་མོས་པའི་ཁྱད་པར་དང་འཚམ་འཕྲིན་ལས་རླབས་ཕྲེང་འཁྱིལ་བའི་ལྟོར། །བུ་རམ་ཤིང་པའི་དགྱེས་འཛུམ་པད་མོ་ཡོངས་སུ་གསལ་ལ་སློང་བར་ནུས། །

སྐྱེ་དགུའི་ཡིད་ཀྱི་རྙོག་མའི་ཆུ་ཀློང་བགྲུང་བྱེད་སྣ་ཚོགས་ཐབས་མཁས་པ། །དྷརྨ་ཤྲཱིའི་གར་ལ་དབང་འབྱོར་འཇམ་དབྱངས་བླ་མའི་ཞབས་རྡུལ་མཆོད། །

གང་གི་ཞབས་མཐིལ་གོར་མའི་གཞི་ལ་བཀོད་པའི་མཚན་མ་རེ་རེས་ཀྱང་། །མཐོང་བའི་མོད་ལ་བ་སྤུའི་ཚལ་འདི་གཡོ་བར་ནུས་བཞིན་སུས་ཀྱང་མིན། །

གང་ཞིག་ལེགས་བྱས་འོ་མའི་མཚོ་ཆེན་དུས་ཀྱི་མཐར་ཡང་ཆེར་སྤྲོ་བའི། །མཚན་དཔེའི་འཁྲིལ་བག་སྟོན་གྱི་ཟླ་བའི་འཛུམ་ཞལ་པད་དཀར་སྙིང་ནས་དྲན། །

མཚུངས་མེད་ཐུགས་རྗེ་ཆེན་པོ་ལས་འཁྲུངས་དགའ་ལྡན་ཡིད་དགའ་ཆོས་འཛིན་ལྟའི། །སྔ་འགྱུར་བྱམས་ཆེན་ཆོས་འཁོར་གླིང་གི་རྟེན་བཞེང་ནོར་བུའི་ཕྲེང་མཛེས་དང་། །

སྐར་ཚོགས་ལྟར་བཀྲའི་ངུར་སྨྲིག་རྒྱན་འཆང་སློབ་བརྒྱུད་འདུས་སྡེ་དེའི་སླད་དུ། །སྐུ་ཚེའི་མཛད་འཕྲིན་ཁུར་ཆེན་འདེགས་མཁས་ལྷ་དེ་དྲན་པས་སྙིང་ནས་འབོད། །

ཉེ་རིང་ཁྱད་མེད་སྙིང་རྗེས་འགྲོ་ལ་མོས་པ་དང་འཚམ་ཁྱོད་ཞལ་ལས། །དྲི་མེད་གསུང་གི་བདུད་རྩིའི་ཐིགས་པ་རེ་རེའི་ཡོན་ཏན་མྱངས་པའི་ཆ། །

གསེར་དང་དངུལ་གྱི་སྡེར་ལ་བཅེར་བའི་ཞལ་ཟས་རོ་བརྒྱས་མཚོན་མིན་པ། །བཟོད་པར་མ་གྱུར་དུས་གསུམ་ཀུན་ཏུ་རྨི་ལམ་ལ་འང་འཆར་ལ་བྲེལ། །

ཨ་ཧོ་སྔར་ཞིག་གང་སྐུའི་གཟི་བྱིན་སྐྱེ་བྲི་མེད་པར་བཞུགས་པའི་ཚེ། །རང་དང་སྐལ་བཟང་འགྲོ་ལ་ཡོངས་སྨན་དབང་ལུང་མན་ངག་བགྲང་ཡས་པ། །

བསྩལ་བའི་བཀའ་དྲིན་བདེ་ལྡན་ཞིང་གི་སྟོན་པ་ལས་ཀྱང་འགོངས་གྱུར་པའི། །དཔྱང་ཐག་ཆོད་དེ་སྐྱེན་པོར་མགོན་ཁྱོད་ལུང་དུ་སྟོན་པ་སྙིང་ནས་སེམས། །

བྱེ་བ་ཕྲག་བརྒྱའི་ཡོན་ཏན་མཐའ་མེད་བདག་དང་བདག་འདྲས་ལྟ་ཅི་སྨྲོས། །ནམ་མཁའི་མཐར་གཏུགས་རྡུལ་གྱི་གྲངས་རྙེད་ཐུབ་པ་ཀུན་ཀྱང་འཇལ་ལ་ངལ། །

སྡེབ་སྦྱོར་བཅོས་མའི་རིག་བྱེད་མ་ཡིན་བདེན་དོན་མཛུབ་རྩེར་བླངས་ཙམ་འདིས། །མཚུངས་མེད་བླ་མའི་བྱིན་རླབས་བདུད་རྩིར་བདག་ཅག་བདེ་དགར་སྤྱོད་གྱུར་ཅིག །

ཅེས་པ་འདི་སྐྱབས་རྗེ་བླ་མ་བཀའ་དྲིན་ཅན་གྱི་དགོངས་པ་ཆོས་དབྱིངས་སུ་ཐིམ་པའི་ཚུལ་བསྟན་ནས་བགྲང་བྱ་༡༡ལོན་པའི་རྗེས་དྲན་དུ་རས་གཟན་གྱིས་བྲིས།