ལྷ་སའི་དམངས་གཞས་བདམས་བཀོད།

མ་བྲིས་རི་མོ་ལེགས་པ།།

སེམས་ཅན་སྟག་གི་རི་མོ༎

བྲིས་ན་འགྱུར་བ་མེད་པ༎

ཆུང་འདྲིས་ལ་རྒྱའི་རི་མོ༎

སེར་བྱ་ངང་བ་བཞིན་དུ།།

བརྩེ་དུང་ཁྱོད་ལ་ཡོད་ན༎

ཟ་རྒྱུ་འདམ་ལས་མེད་ཀྱང་༎

མཉམ་ཟ་མཉམ་འཐུང་བྱས་ཆོག།

ཆང་མ་བརྒྱ་དང་བརྒྱད་ཅུའི༎

ཆང་ལ་ཞིམ་རྒྱུ་མི་འདུག།

བྱམས་པས་བཙོས་པའི་ཆང་དེ༎

བདུད་རྩི་མིན་ན་གང་ཡིན༎

ཉ་རྒྱས་བཅོ་ལྔའི་ཟླ་བ༎

ཀུ་མུད་བཞད་ཁ་ཕྱེ་བྱུང་༎

བརྩེ་བའི་ཆུང་འདྲིས་བྱམས་པས༎

ཡིད་ཀྱི་གདུང་བ་སེལ་བྱུང་༎

སྐྱེ་བ་འདི་ནས་འཕོས་ནས༎

ཤིག་གི་ལུས་ལ་བླངས་ན༎

བུ་མོ་པད་མ་ལགས་ཀྱི༎

མཆན་ཁུང་འོག་ནས་བསྡད་ཆོག།

ཞིང་ཆུང་ལོ་ཏོག་ཡག་པའི༎

འོང་སྐོར་བྱེད་དུ་ཕྱིན་པས༎

སྲན་མས་ལག་བཏང་གཏོང་གིས༎

སྙེ་མོས་མགོ་གཡུག་རྒྱག་གི༎

གསེར་གྱི་སྙེ་མའི་ཞིང་ལ༎

བུ་མོ་མེ་ཏོག་འདྲ་བ༎

སེམས་ལ་ཡོད་པའི་བུ་མོའི༎

ཐུགས་ལ་ག་ལེར་དགོངས་བྱུང་༎

སེམས་མཐུན་ཆུང་འདྲིས་བྱམས་པར༎

གཡུ་ཡི་ཚིགས་ཁེབས་བསྒྲོན་ཡོད༎

སེམས་པ་མཐུན་པའི་གཡུ་ཆུང་༎

ཚིགས་ཁེབས་ནང་དུ་བྲིས་ཡོད༎

ལྷ་སའི་བར་སྐོར་གླིང་ནས༎

མུ་ཏིག་ཕྲེང་བ་རྙེད་བྱུང་༎

ཕྲེང་བ་མ་ཟད་བར་དུ༎

ཕྲེང་ཐག་ཆད་ས་མི་འདུག༎

པད་སྒྲོན་འཁྲིད་ན་ངོ་ཚ༎

པད་སྒྲོན་བཞག་ན་སྙིང་རྗེ༎

པད་སྒྲོན་སྤ་ཁུག་ནང་གི༎

གཡང་རྟེན་ཡིན་ན་བསམ་བྱུང་༎

ལྷ་སའི་ཁྲོམ་གཟིགས་སྒང་ལ༎

བསྐོར་བ་ལན་གསུམ་བརྒྱབ་པས༎

འཛམ་བུ་གླིང་ལ་བསྐོར་བའི༎

སྣང་བ་ཡིད་ལ་ཤར་བྱུང་༎

ཁྱེད་རང་མེ་ཏོག་ཀུ་མུད༎

ང་རང་བཅོ་ལྔའི་ཟླ་བ༎

ལས་དང་བསྐལ་བ་ཡོད་ན༎

མཇལ་བའི་དུས་ཤིག་ཤར་འོང་༎

གྲུ་ཤིང་རྟ་མགོ་ཟེར་བ༎

རྣ་བས་ཐོས་པ་མ་གཏོགས༎

རྟ་མགོའི་དར་ལྕོག་མཐོང་བ༎

ད་རེས་ཙམ་ཞིག་ཡིན་ནོ༎

ཆུང་འདྲིས་ལུང་བའི་ཕུ་བྱས༎

ང་རང་ལུང་བའི་མདའ་བྱས༎

སེམས་པ་ཆུ་ལ་བསྐུར་ཤོག།

རག་སྐྱོགས་སེར་པོས་བཅུས་ཆོག།

མཐོ་ན་རྒྱལ་མཚན་མཐོ་བ༎

མཛེས་ན་རྒྱལ་མཚན་མཛེས་པ༎

རྒྱལ་མཚན་ཁོག་སྟོང་ཡིན་པ༎

དེ་རིང་མ་གཏོགས་མ་ཤེས༎

བློ་ཡོད་ལྕང་གསར་ཐོག་ཏུ༎

བྱ་ཚང་བཟོ་རྒྱུ་བྱུང་ན༎

བློ་མེད་ཤིང་རྒན་རྒས་པོའི༎

ཡལ་ག་ཆག་ན་ཆག་ཅིག།

སང་ལ་ཁ་བ་བབས་པ༎

མཛོ་གཡག་གཉིས་ཀྱིས་མ་ཤེས༎

བུ་མོར་སྙིང་སྡུག་ཡོད་པ༎

བུ་ཆུང་བདག་གིས་མ་ཤེས༎

ཆུ་མོ་དབྱར་ཆུ་སླེབས་སོང་༎

དགུན་ཆུ་ག་ལེར་བཞུགས་དང་༎

ཚེ་གང་གཏན་གྲོགས་སླེབས་སོང་༎

སྙིང་སྡུག་ག་ལེར་བཞུགས་དང་༎

མ་ཞིང་བཞག་ནས་རི་ཞིང་རྨོ༎

རི་ཞིང་ལྗང་ལོ་ཨེ་ཡག་དྲན༎

རི་ཞིང་ལྗང་ལོ་མ་ཡག་ན༎

མ་ཞིང་རིག་ན་ངོ་རེ་ཚ༎

རི་མགོ་མཐོན་པོའི་ཉི་མ༎

དྲོ་གྲོགས་མེད་པའི་གྲང་རོགས༎

ས་ཐག་འགྱངས་པའི་ཆུང་འདྲིས༎

དགའ་རོགས་མེད་པའི་སྐྱོ་རོགས༎

ཆུང་འདྲིས་བྱམས་པའི་སེམས་པ༎

ཞི་མིའི་སྤུ་ལས་འཇམ་པ༎

གློ་གྲི་སྐར་མ་སྨིན་དྲུག།

མཛེས་མའི་སེམས་བརྟན་འཇོག་རོགས༎

ཆུ་མོ་ཆུ་རིས་ཤིག་ཤིག།

བྱམས་པའི་སྐྲ་ལོ་འདྲ་བ༎

བྱམས་པ་ཡིད་ལ་མ་འཁོར༎

སྐྲ་ལོ་ཡིད་ལ་འཁོར་བྱུང༎

ཁ་གཅིག་སྐོམ་དུས་མ་ཕན༎

རི་མགོ་མཐོན་པོའི་ཆུ་མིག།

སེམས་པ་སྐྱོ་དུས་མ་ཕན༎

ལ་མོའི་རྒྱབ་ཀྱི་ཆུང་འདྲིས༎

ལག་ཤེས་ཤེས་པའི་ནང་ནས༎

ལྷ་བྲིས་ཤེས་ན་དགའ་བ༎

བུ་མོ་ཆུང་འདྲིས་བྱམས་པའི༎

འདྲ་སྐུ་བཞེངས་དགོས་བསམ་གྱི༎

རྐྱང་པ་ཁ་དཀར་བྱང་ལ་འགྲོ་ལེ་དེ༎

སྤང་ན་ཐིག་ཙམ་གྱི་གཏད་ས༎

བྱ་ངང་པ་མཚོ་ལ་སོང་ལེ་དེ༎

མཚོ་མེ་ལོང་ཙམ་གྱི་གཏད་ས༎

ཕ་རིའི་སྤང་གི་སྟེང་ལ།།

དཀར་པོ་གུར་ཆུང་ཕུབ་ཡོད།།

གུར་མཐའ་རླུང་གིས་བཀྱགས་དུས༎

ཆུང་འདྲིས་ཨེ་ཡིན་བསམ་བྱུང་༎

ཇ་མ་མར་གྱི་སྐྱོ་རོགས༎

གནང་རྩིས་ཐུགས་ལ་ཡོད་ན༎

ཇ་ཁུ་ཆུ་ལ་སིམ་སིམ༎

ང་གཉིས་སིམ་པ་ཞུས་ཆོག།

མིག་གིས་ཕར་ལ་བལྟས་པས༎

སྤྱན་གྱིས་ཚུར་ལ་གཟིགས་བྱུང་༎

སྤྱན་མིག་གཉིས་ཀྱི་བར་ལ༎

ལས་འབྲས་མདུད་པ་ཐེབས་སོང་༎

ཁྱེད་ནི་ནམ་མཁའི་སྤྲིན་པ༎

ང་ནི་ས་སྐྱེས་ལྗང་པ༎

ཁྱེད་སེམས་བདག་ལ་ཡོད་ན༎

མ་བསིལ་ཆར་ཞིག་འབེབས་དང་༎

དབྱར་ཁ་སྤང་གི་གང་ལ༎

མེ་ཏོག་སེར་ཆེན་མཛེས་པ༎

བུ་ཆུང་བདག་གི་བློ་གཏད༎

སེར་ཆེན་ཁྱེད་ལ་བཅོལ་ཡོད༎

ཆུང་འདྲིས་བྱམས་པ་ལྷ་རེད༎

བྱམས་པའི་ཡབ་ཡུམ་བདུད་རེད༎

བདུད་དེ་མ་ཤི་བར་དུ༎

བྱམས་པ་མཇལ་ས་མ་རེད༎

དཀར་གསལ་ཟླ་བའི་དཀྱིལ་གྱི༎

རི་བོང་བློ་ལྡན་ཤེས་རབ༎

དཀར་གསལ་གང་འགྲོའི་ས་ལ༎

རི་བོང་འཁྲིད་རོགས་གནང་དང་༎

རྟ་དང་རྟ་སྒ་བར་ལ༎

མི་འགྱུར་གློ་ཐག་བཏིང་ཡོད༎

གསེར་སྒ་གྱ་གྱུ་མ་བྱེད༎

མི་འགྱུར་བློ་ཐག་བཏིང་ཡོད༎

ཀི་ཞིག་བརྒྱབ་ན་ཆེ་འགྲོ༎

ཕུ་ཞིག་བརྒྱབ་ན་ཆུང་འགྲོ༎

རྩིག་ཟུར་རྡིག་རྡིག་གཏོང་དུས༎

བུ་མོས་འོན་སེང་གནང་དང་༎

ཤ་ཟད་རུས་ལ་ཐུག་ཀྱང་༎

བརྩེ་བའི་ཁྲག་རྩ་སྐམ་མེད༎

ལོ་ཟླའི་སྟངས་སྟབས་འོག་ཏུ༎

དམ་བཅའི་རི་མོ་ཡལ་མེད༎

ཕར་ལ་མིག་གཅིག་བལྟས་པས༎

ཚུར་ལ་སྤྱན་ཞིག་གཟིགས་བྱུང་༎

སྤྱན་མིག་རྫི་མའི་འོག་ནས༎

ལས་འཕྲོའི་མདུད་པ་ཐེབས་སོང་༎

ཤར་ཕྱོགས་རི་བོའི་ལྡེབས་ལ༎

ཤྭ་བ་ཕར་རྒྱུག་ཚུར་རྒྱུག།

མདའ་མོ་རྒྱག་དགོས་བསམ་ནས༎

གཞུ་མོ་བཀུག་ནས་བསྡད་ཡོད༎

མདའ་མོ་འབེན་ལ་ཕོག་སོང་༎

མདེའུ་ས་ལ་འཛུལ་སོང་༎

ཆུང་འདྲིས་བྱམས་པ་འཕྲད་བྱུང་༎

སེམས་ཉིད་རྗེས་ལ་འབྲངས་སོང་༎

ཆང་ལ་ཆུ་གཅིག་བརྒྱབ་པས༎

སྦང་མ་ཁ་རུ་བྱིངས་སོང་༎

ང་དང་བུ་མོའི་ལས་དེ༎

དང་པོ་དེ་ནས་འཕྱུག་སོང་༎

ང་རང་མི་འགྲོ་བསམ་ཡང་༎

རྟ་ཕོས་མཚན་བསླངས་བཏང་བྱུང་༎

རང་སེམས་རང་ལ་མི་གནས༎

བྱམས་པའི་ཕྱོགས་ལ་ཤོར་སོང་༎

ཆོས་ཀྱི་ཆོས་བཟང་དྲན་བྱུང་༎

ཡར་འབྲོག་བསམ་སྡིངས་དྲན་བྱུང་༎

བསམ་སྡིངས་མིག་གིས་མ་མཐོང་༎

རྒྱ་གླིང་རྣ་བས་ཐོས་བྱུང་༎

བསམ་ཡས་བྱ་ཕོ་དཀར་པོ༎

བྱ་སྐད་སྔ་པོ་མ་རྒྱག།

ང་དང་ཆུང་འདྲིས་བྱམས་པའི༎

སྙིང་གཏམ་བཤད་འཕྲོ་ལུས་ཡོད༎

རྟ་དང་རྟེའུའི་བརྩེ་དུང་༎

ང་རང་གཉིས་ལ་བྱུང་བ༎

བརྟོད་ཐག་ཕུར་བའི་ལོགས་ནས༎

གྲོལ་བའི་ཐབས་ཤིག་བཏང་ཆོག།

གསེར་གྱི་ཐོག་ཁུར་འགྲོ་བ༎

དངུལ་གྱི་སྐས་འཛེགས་དགོས་ཀྱིས༎

ཡིད་འཕྲོག་མཛེས་མ་འཚོལ་བར༎

རྡོ་ཡི་ཞགས་པ་དགོས་ཀྱིས།།

ཆུ་ལ་ཟམ་པའི་སྐྱོར་མ༎

བྲག་ལ་ཐེམ་པའི་སྐྱོར་མ༎

ཨོ་ལོ་མི་ཡུལ་འགྲིམ་དུས༎

དཀོན་མཆོག་གསུམ་གྱི་སྐྱོར་མ༎

ཆོས་གཅིག་བྱེད་དགོས་བསམ་ནས༎

དགའ་ལྡན་ཕྱོགས་ལ་ཕྱིན་པས༎

ཡར་བལྟས་བླ་མ་མ་མཇལ༎

མར་བལྟས་ཆུང་འདྲིས་མཇལ་བྱུང་༎

བཀྲ་ཤིས་ལུང་པའི་ཕུ་ལ༎

གསེར་གྱི་མཁར་རྔ་བརྡུངས་བྱུང་༎

རྡུང་མི་སུ་ཡིན་མ་ཤེས༎

ཉན་མི་མཆི་མ་བབས་བྱུང་༎

ཕུ་ཡི་སྤང་རྒྱན་མེ་ཏོག།

ག་ལེར་བཞུགས་གདན་འཇགས་དང་༎

ང་ལ་ལུང་པའི་མདའ་ནས༎

སྲན་མའི་མེ་ཏོག་རྙེད་བྱུང་༎

དགའ་ལྡན་དབང་བོའི་རི་ལ༎

དབྱར་རྩྭ་མེད་པའི་དགུན་རྩྭ༎

ང་དང་ཆུང་འདྲིས་བྱམས་པ༎

ལུས་འདྲེས་མེད་པའི་མི་ཁ༎

མི་ཁ་བཟོ་མཁན་ཁ་ལ།།

སྒོ་ལྕགས་རྒྱག་རྒྱུ་བྱུང་ན༎

བཟོ་བ་དམྱལ་བའི་གཏིང་ལ༎

འབོད་དགོས་བྱུང་ཡང་དྲག་པ༎

ཁམ་བུའི་ཕྱི་ཁོག་ཞིམ་པ༎

སྟར་ཁའི་ནང་ཁོག་ཞིམ་པ༎

ཞིམ་པོའི་མངའ་རིས་ཁམ་བུ༎

འགྲམ་སྦུག་གཡས་ལ་བཅུགས་ཡོད༎

བྲག་དེ་རྡོ་རྗེ་བྲག་ལ༎

རྒོད་པོས་རྒོད་ཚང་བསགས་ཡོད༎

རྒོད་པོ་སྐུ་ཚེ་རིང་ཤོག།

རྒོད་ཕྲུག་གནས་བཟོད་བདེ་བ༎

རྐང་ལ་མ་འགྲིག་ལྷམ་རེད༎

འཇའ་ཆེན་ཡིན་ཡང་མི་ཞུ༎

བློ་ལ་མེད་པའི་བྱམས་པ༎

རྒྱལ་སྲས་ཡིན་ཡང་མི་དགོས༎

བདག་གིས་བཙལ་བའི་ཆུང་འདྲིས༎

གཞན་གྱིས་འཕྲོག་གི་ཡོད་ན༎

སྐེད་པར་བཏགས་པའི་གྲི་དེ༎

སྐྱོ་མ་ལྡག་ཡས་མ་རེད༎

ང་ཡིས་བཏབ་པའི་མེ་ཏོག།

གཞན་གྱིས་བཏོག་རྒྱུ་ཟེར་ན༎

འཇིག་རྟེན་སྣང་བའི་དོད་དུ༎

སྲོག་གིས་སྐྱིན་ཚབ་འཇལ་དགོས༎  

སེམས་ཉིད་ལྕགས་ཀྱི་ཨ་ལོང་༎

ནད་མེད་གཅོང་ལ་ཚུད་སོང་།།

འདྲིས་པའི་ཆུང་འདྲིས་མ་གཏོགས༎

སྨན་པ་བརྒྱ་ཡིས་མ་ཕན༎

སྔ་དྲོ་གསེར་བྱ་ཡིན་ཟེར༎

པོ་ཏ་ལ་རུ་ཕེབས་ཀྱིས།།

དགོང་མོ་གཡུ་བྱ་ཡིན་ཟེར༎

ཡ་མོན་གཞུང་ལ་ཕེབས་ཤག

ཆུང་འདྲིས་ཁྱོད་ལ་ཅི་དགོས༎

ཅི་དགོས་ང་ལ་གསུང་དང་༎

ནམ་མཁའི་སྐར་མ་ཡིན་ཡང་༎

འཇའ་སྐས་བཙུགས་ནས་བླངས་ཆོག།