འབྲོམ་སྟོན་པ་རྒྱལ་བའི་འབྱུང་གནས།

མཛད་པ་པོ། ཡོངས་འཛིན་ཡེ་ཤེས་རྒྱལ་མཚན།

ལམ་བཟང་གསལ་མཛད་སྟོན་པ་རིན་པོ་ཆེ། ཞེས་བསྔགས་པ། འབྲོམ་སྟོན་པ་རྒྱལ་བའི་འབྱུང་གནས་ཞེས་མཚན་ཡོངས་སུ་གྲགས་པ་དེ་ནི། སྔོན་བསྐལ་པ་དཔག་ཏུ་མེད་པའི་སྔ་རོལ་ནས་ཐུགས་བསྐྱེད་དེ། རྫོགས་སྨིན་སྦྱང་གསུམ་མཐར་ཕྱིན་ནས། འཕགས་པ་ཐུགས་རྗེ་ཆེན་པོ་ཞེས་སངས་རྒྱས་ཀྱི་ཞིང་ཐམས་ཅད་དུ་གྲགས་ཤིང་། སྤྲུལ་པའི་བཀོད་པས་སངས་རྒྱས་ཀྱི་ཞིང་ཐམས་ཅད་དང་། མ་དག་པའི་འཇིག་རྟེན་གྱི་ཁམས་ཐམས་ཅད་ཁྱབ་ཅིང༌། བདེ་བ་ཅན་དུ་མགོན་པོ་འོད་དཔག་ཏུ་མེད་པའི་སྲས་ཀྱི་ཐུ་བོའི་ཚུལ་བཟུང་བ་སོགས། ཕྱོགས་བཅུའི་སངས་རྒྱས་ཐམས་ཅད་ཀྱི་དྲུང་ན་སྲས་ཀྱི་ཐུ་བོའི་ཚུལ་འཛིན་པ་དང༌། ཞིང་ཁམས་ལ་ལར་འཚང་རྒྱ་བའི་ཚུལ་སྟོན་པ་དང༌། འཇིག་རྟེན་གྱི་ཁམས་ལ་ལར་འཁོར་ལོས་བསྒྱུར་བའི་རྒྱལ་པོ་དང༌། ལ་ལར་བློན་པོ། ལ་ལར་སྡེ་དཔོན། ལ་ལར་མཁན་པོ། ལ་ལར་ཕ་མ། ལ་ལར་བྱ་དང་རི་དྭགས་ཚུན་ཆད་ཀྱི་ཚུལ་བཟུང་སྟེ། གང་ལ་གང་འདུལ་གྱི་སྐུའི་བཀོད་པས་སེམས་ཅན་གྱི་དོན་མཛད་བཞིན་པ་ལས། མི་མཇེད་འཇིག་རྟེན་གྱི་ཁམས་འདིར་སྐལ་བཟང་གི་སངས་རྒྱས་སྟོང་གང་དུ་འཚང་རྒྱ་བའི་ཚུལ་སྟོན་པའི་གནས་འཛམ་བུའི་གླིང་གི་ལྷོ་ཕྱོགས་ན་པོ་ཏ་ལ་ཞེས་བྱ་བའི་སྤྲུལ་པའི་ཞིང་ཁམས་ཞིག་ན་བཞུགས་པ་ལས། ཕྱོགས་བཅུའི་རྒྱལ་བ་སྲས་དང་བཅས་པ་གདན་འཛོམས་ཏེ། བྱང་ཆུབ་སེམས་དཔའ་སྒྲིབ་པ་རྣམ་སེལ་ཕོ་ཉར་མངགས་ཏེ། བྱང་ཕྱོགས་ཁ་བ་ཅན་གྱི་ལྗོངས་འདིའི་གདུལ་བྱ་རྒྱལ་བ་གཞན་གྱིས་འདུལ་བར་མ་ནུས་པའི་དམུ་རྒོད་ཅན་འདི་རྣམས། ཐུགས་རྗེ་ཆེན་པོ་ཉིད་ཀྱིས་འདུལ་བར་འོས་སོ་ཞེས་བོད་ཁམས་ཀྱི་མགོན་པོར་འབྱོན་པའི་ཐུགས་རྗེ་བསྐུལ། དེ་བཞིན་དུ་ཆོས་རྒྱལ་དཀོན་མཆོག་འབངས་ཨྱོན་གྱི་ཡུལ་དུ་བྱོན་པའི་ཚེ། བླ་མ་དྲི་མ་མེད་པ་མཁའ་འགྲོ་བྱེ་བའི་ཚོགས་དང་བཅས་པས་ཀྱང་། ཁ་བ་ཅན་དུ་བྱོན་ནས་སེམས་ཅན་གྱི་དོན་མཛད་དགོས་པར་བསྐུལ་བ་ལ་བརྟེན་ནས། འཕགས་པ་ཐུགས་རྗེ་ཆེན་པོས་མི་རྗེའི་ཚུལ་བཟུང་ནས། བོད་དུ་རྒྱལ་ཁྲིམས་བཙན་པོས་ཐམས་ཅད་དབང་དུ་བསྡུས། དགེ་བཅུའི་ཁྲིམས་ཀྱིས་ཆོས་ཀྱི་སྣོད་རུང་དུ་བྱས། སངས་རྒྱས་ཀྱི་བསྟན་པའི་གཞི་ཆགས་པ་ན། བླ་མ་དྲི་མ་མེད་པ་རྒྱ་གར་དུ་གནས་ལྔ་མཁྱེན་པའི་པཎ་ཆེན་དཔལ་མར་མེ་མཛད་ཡེ་ཤེས་ཞེས་བྱ་བར་སྐུ་འཁྲུངས་ནས། གདུལ་བྱ་འདུལ་བའི་དུས་ལ་བབ་པ་ན། ཐུགས་རྗེ་ཆེན་པོ་འབྲོམ་རྗེར་སྐུའི་བཀོད་པ་བསྟན་ཏེ།

དེ་ཡང་འབྲོམ་རིན་པོ་ཆེ་གང་དུ་འཁྲུངས་པའི་གནས་ནི། གངས་རིའི་ཕྲེང་བས་ཡོངས་བསྐོར་ས་ཡི་གཞི། །ལྷ་ཆེན་ཟུར་ཕུད་ལྔ་པས་བསྟེན་པའི་འདབས། །རྗེའུའི་རིགས་ལས་འབྲོམ་ཞེས་རབ་གྲགས་པར། །གཙོ་བོའི་རིགས་སུ་འཁྲུངས་ལ་ཕྱག་འཚལ་ལོ། །ཞེས་གསུངས་པ་ལྟར། དབུ་རུའི་བྱང་གི་ཕྱོགས་ལྷ་ཆེན་ཐང་ལྷའི་ཞོལ། སྟོད་ལུང་གི་ཕུ་རྩ་སྐྱེ་མོའི་སའི་ཆར། ཡབ་སྐུ་གཤེན་ཡག་གཞེར་འཕེན་དང༌། ཡུམ་ཁུ་འོད་བཟའ་ལན་ཅིག་མ་གཉིས་ཀྱི་སྲས་སུ་ཤིང་ཕོ་འབྲུག་གི་ལོ་སྐུ་འཁྲུངས།

དེ་ཡང་ཡབ་ཀྱིས་མ་ཡར་གཅིག་བཞེས་ཏེ། དེ་དང་འགྲོགས་ནས་ཡོད་པ་ལ། དེ་དང་ཐུགས་མ་མཐུན་པའི་རྐྱེན་གྱི་བསྐུལ་ཏེ། གཞུ་རུ་ཞང་པོའི་སར་ལོ་བཅུ་གསུམ་ཙམ་ལ་བྱོན། དགེ་བཤེས་གཡུང་ཆོས་མགོན་བྱ་བ་ལ་ཀློག་ཡིག་བསླབས། དེར་ལོ་བཞི་བཞུགས།

དགུང་ལོ་བཅུ་བདུན་ལོན་ཙ་ན། ཇོ་བོ་སེ་བཙུན་གཞོན་ནུ་གྲུམ་གྱི་མཁན་བུ་ཆེན་པོ་དེ་རྒྱ་གར་དུ་བཞུད་པའི་ཐུགས་དགོངས་ཀྱིས་བྱོན་པ་དང་གདན་འཛོམས་པས། ཤིན་ཏུ་དད་པར་གྱུར་ཏེ། བླ་མ་སེ་བཙུན་ལ་ཇོ་བོ་ཐུགས་རྗེ་ཆེན་པོ་ཡི་གེ་དྲུག་པའི་གདམས་པ་ཞུས། དེ་ནས་སེ་བཙུན་ཡར་བཞུད། བལ་ཡུལ་དུ་བྱོན་ནས་ཕྱི་རོལ་པའི་པཎྜི་ཏ་ཞིག་དང་ཆོས་གཏམ་བྱས་པས་སེ་བཙུན་རྒྱལ། ཕྱི་རོལ་བའི་མངོན་ཤེས་དང་ཁོང་གི་དཔྱད་འགྲན་པས། སེ་བཙུན་མ་ཐུབ་ནས། དེར་སེ་བཙུན་གྱི་ཐུགས་དགོངས་ལ་ཕྱི་རོལ་བས་ངན་བྱས་དོགས་པ་དང༌། རྒྱ་གར་ནའང་ང་རང་བས་མཁས་པ་མེད་དམ་སྙམ་ནས། ཕྱིར་ལོག་བྱོན་པ་དང་གདན་འཛོམས་པས། འབྲོམ་རིན་པོ་ཆེས་བླ་མ་སེ་བཙུན་ལ་ཕྱག་ཕྱིར་འཁྲིད་པར་ཞུས་པས། སང་ཕོད་ཚོང་པ་དང་འགྲོགས་ལ་ཤོག །ད་རེས་ཁྲིད་ན་བྱིས་པ་བརྐུས་ནས་ཁྲིད་ཟེར་དུ་འོང་གསུངས། དེ་ནས་འབྲོམ་རིན་པོ་ཆེས་རྒྱལ་གྱི་ཞང་སྣ་ནམ་རྡོ་རྗེ་དབང་ཕྱུག་ལ་དགེ་བསྙེན་གྱི་སྡོམ་པ་མནོས་ཏེ། མཚན་རྒྱལ་བའི་འབྱུང་གནས་སུ་གསོལ།

དགུང་ལོ་བཅུ་དགུ་པ་ལ་བབ་པ་ན། མདོ་ཁམས་ཕྱོགས་སུ་འགྲོ་བའི་ཚོང་པ་དང་འགྲོགས་ཏེ། མདོ་ཁམས་ལྡན་མའི་ཡུལ་དུ་བྱོན་ནས་བླ་མ་སེ་བཙུན་བསམ་སྦྱོར་གཉིས་ཀྱི་སྒོ་ནས་ཚུལ་བཞིན་དུ་བསྟེན་ཏེ། སངས་རྒྱས་ཐམས་ཅད་མཆོད་པ་བས། བླ་མ་མཆོད་པ་ཕན་ཡོན་ཆེའོ་ཞེས་གདུལ་བྱ་རྣམས་ལ་འདོམ་པའི་ཕྱིར། བླ་མ་སེ་བཙུན་གྱི་ནང་གི་ཞབས་ཏོག་ཕྱེ་འཐག་པ་ཡན་ཆོད་དང༌། ཕྱི་རོལ་ཏུ་རྟ་ཕྱུགས་མང་པོ་ཡོད་པས་ཉིན་པར་དེ་རྣམས་ཀྱི་རྫི་བོ་མཛད། ནུབ་མོ་རྟ་བཟང་ལ་ཞོན། འཁོར་གསུམ་ཚེར་མ་འདྲ་བ་བྱས་ཏེ་མེལ་ཚེ་མཛད། ཕྱེ་འཐག་པ་ན་དཔེ་ཆ་རང་ཐག་གི་སྟེང་དུ་བཞག་སྟེ་གཟིགས་པ་ལ་སོགས་པའི་སློབ་གཉེར་ལ་བརྩོན་པར་མཛད། ཕྱེ་བཏགས་པས་ཕྱག་མཐིལ་གླང་རྒན་གྱི་མཇིང་པ་ལྟར་སོང༌། ཇོ་བོ་སེ་བཙུན་དེ་ཡོ་བྱད་ལ་ཆགས་པ་མི་མངའ། གཏོང་བར་ཡང་མི་མཛད་ཀྱང་མ་དད་པ་མ་བྱུང༌། སེ་བཙུན་གྱི་བྱ་བྱེད་ལ་ཡང་དཀའ་བ་མ་བྱུང་གསུངས།

འབྲོམ་རིན་པོ་ཆེ་འདི་ནི། ལམ་གྱི་རྩ་བ་བཤེས་གཉེན་བསྟེན་པའི་ཚུལ་ལ་རྒྱལ་བ་སྲས་བཅས་ཀུན་གྱིས་བསྔགས་པར་འོས་པ་ཞིག་བྱུང་སྟེ། ཤེར་ཕྱིན་གྱི་མདོ་སྡེ་རིན་པོ་ཆེར་བཤེས་གཉེན་བསྟེན་པའི་ཚུལ་ལ་བྱང་ཆུབ་སེམས་དཔའ་རྟག་ཏུ་ངུ་བསྔགས་འོས་སུ་མཛད་པ་ལྟར། འབྲོམ་རིན་པོ་ཆེ་འདི་ཡང་བྱང་ཆུབ་སེམས་དཔའ་རྟག་ཏུ་ངུ་དང་ལུས་ཀྱི་རྐང་བཏང་མ་བཏང་གི་ཁྱད་ལས་མེད་པ་ཞིག་བྱུང༌།

དེའི་ཚེ་བླ་མ་སེ་བཙུན་གྱི་སྤྱན་སྔར་མདོ་སྔགས་ཀྱི་གཞུང་མཐའ་ཡས་པ་ལ་སྦྱངས་ཤིང༌། ཁྱད་པར་བདག་ཉིད་ཆེན་པོ་འཕགས་པ་ཀླུ་སྒྲུབ་ཡབ་སྲས་ཀྱི་གཞུང་དབུ་མའི་སྐོར་དང༌། བྱམས་ཆོས་སྡེ་ལྔ་དང༌། ཐོགས་མེད་སྐུ་མཆེད་ཀྱི་གཞུང་རྣམས་སོགས་སྤྱོད་ཕྱོགས་རྣམས་ལ་རྩལ་དུ་ཐོན་པར་སྦྱངས་ཏེ། ཆོས་གྲྭར་དགེ་འདུན་བྱིངས་དང་བགྲོ་གླེང་མཛད་པ་ན། བདག་ཉིད་ཆེན་པོ་འདི་ལ་སུས་ཀྱང་ལན་འདོན་སྤོབས་པར་མ་ནུས་ནས། མཁས་པའི་ཕུལ་དུ་ཕྱིན་པར་གྲགས། དེའི་ལོ་དགེ་འདུན་རྣམས་ཀྱིས་མཁས་པ་ཆེན་པོ་འདི་ལྟ་བུ་རྟ་བོང་གི་རྫི་བོ་དང་། ཡོས་འཐག་པ་སོགས་ངན་ལས་ལ་བཀོལ་དུ་ཕངས་པས། ད་ཕྱིན་ཆད་ངན་ལས་བགྱི་མི་དགོས་པར་ཆོས་གྲྭར་ཕེབས་ཆོག་པ་དགོས་ཞེས་བླ་མ་སེ་བཙུན་ལ་ཞུས་ནས། དེ་བཞིན་དུ་གནང༌། དུས་དེའི་ཚེ་ཁུ་སྟོན་བརྩོན་འགྲུས་གཡུང་དྲུང་དང་། རྔོག་ལེགས་པའི་ཤེས་རབ་གཉིས་ཀྱང་ཆོས་གྲྭ་དེར་བཞུགས་པས། ཁུ་རྔོག་འབྲོམ་གསུམ་ཞེས་པའང་ཁམས་སུ་གྲགས་པ་ཡིན།

དེ་ནས་འབྲོམ་རིན་པོ་ཆེའི་ཐུགས་དགོངས་ལ། དལ་འབྱོར་གྱི་མི་ལུས་ཐོབ་པར་དཀའ་བ་རྙེད་དུས་འདིར་ཆོས་རྣལ་མ་ཞིག་བྱེད་ན་འདི་ཙམ་གྱི་ཆོག་གམ་མི་ཆོག །རྒྱ་གར་མཁས་པ་ཞིག་ལ་འདྲི་བ་ལ། བར་དུ་ལོ་ཙཱ་མི་དགོས་པ་ཞིག་བྱ་དགོངས་ཏེ། པཎྜི་ཏ་སྒྲའི་ཚེར་མ་ཞེས་བྱ་བ་སྨྲི་ཏི་ཛྙཱ་ན་ཀིརྟི་ཕྱོགས་དེར་བྱོན་པ་ལ་སཾ་སྐྲྀ་ཏའི་སྐད་དང་རྒྱ་ཡིག་ཀྱང་བསླབས་པས་ལེགས་པར་མཁྱེན། དེ་དུས་འབྲོམ་རིན་པོ་ཆེས། པཎྜི་ཏ་སྨྲི་ཏི་ལ་རྒྱ་གར་ན་ད་ལྟ་པཎྜི་ཏ་ཆེ་བ་ཇི་སྐད་བྱ་བ་ཡོད་དྲིས་པས། ཆེ་བགྲེས་ནཱ་རོ་པ་དང་ཤཱནྟི་པ་བྱ་བ་ཡོད། དེ་གཉིས་ད་ཙམ་འདས་སམ། ད་ལྟ་པཎྜི་ཏ་དཱི་པཾ་ཀ་ར་བྱ་བ་རྒྱལ་རིགས་ལས་རབ་ཏུ་བྱུང་བ་ཞིག་ཡོད་དེ། དེ་རང་ཆེ་བར་འོང་ཟེར་བས། འབྲོམ་རིན་པོ་ཆེའི་ཐུགས་ལ་དེ་དང་མཇལ་ན་དགའ་བ་ལ། དེ་དང་ཅི་མཇལ་བྱ་དགོས་སྙམ་པ་བྱུང༌།

དེ་ལྟར་འབྲོམ་རིན་པོ་ཆེས། མདོ་ཁམས་སུ་བླ་མ་སེ་བཙུན་གྱི་སྤྱན་སྔར་ལོ་ཉི་ཤུའི་བར་དུ་བཞུགས་ཏེ། མདོ་སྔགས་ཀྱི་ཆོས་མང་དུ་གསན་པས་མཁས་པའི་ཕུལ་དུ་ཕྱིན། དགེ་བསྙེན་ཆོས་འཕེལ་དུའང་གྲགས་པ་བྱུང་སྟེ། དེ་ལྟར་འབྱུང་བར་རྒྱལ་བ་ཉིད་ཀྱིས་མདོ་ལས་ལུང་བསྟན་པ་ནི། སྙིང་རྗེ་པད་དཀར་དུ། བྱང་ཕྱོགས་སུ་བསྟན་པ་ལ་དད་པ་ལྷར་སྐྱེ་ཞིང༌། རབ་བྱུང་ཆོས་བཞིན་མི་སྤྱོད་པ་ལོག་པར་ལྷུང༌། དེར་དགེ་བསྙེན་ཆོས་འཕེལ་ཞེས་པ་རྫུ་འཕྲུལ་དང་ལྡན་པ་འབྱུང༌། ཞེས་པ་དང༌། སངས་རྒྱས་ཕལ་པོ་ཆེར། བྱང་ཕྱོགས་སུ་དགེ་བསྙེན་ཆོས་འཕེལ་བྱ་བ་འབྱུང་ཞེས་ལུང་བསྟན་པ་དང་མཐུན་ནོ། །

དེ་ནས་ཇོ་བོ་མངའ་རིས་སུ་ཕེབས་པ་འགྲུལ་པ་ལས་གསན་པས། སེ་བཙུན་ལ་མངའ་རིས་སུ་འགྲོ་བར་ཞུས། ཁོང་གིས་ཀྱང་མི་དགྱེས་པ་མེད་པར་དཔེ་རྟ་ཁལ་གཅིག་གནང་ནས་བྱོན་ནོ། །བྱང་ལམ་དུ་སླེབ་ཙ་ན། མངའ་རིས་ཀྱི་ལྷ་བླ་མ་ཁུ་དབོན་གྱིས་ཇོ་བོ་རྗེ་ལྷ་ཅིག་བྱ་བའི་པཎྜི་ཏ་ཆེན་པོ་ཞིག་གདན་དྲངས་ནས་ཡོད། དེ་རིང་པོར་མི་ཐོགས་པར་རྒྱ་གར་དུ་བཞུད་པར་འདུག་བྱ་བ་གསན་པས། དེར་ཇོ་བོའི་མཚན་ཐོས་པ་ཙམ་གྱིས་ཐུགས་རང་དབང་མེད་པར་གཡོས་ཏེ། དད་གུས་བསམ་གྱིས་མི་ཁྱབ་པ་འཁྲུངས། མཇལ་དུ་འབྱོན་པའི་འདུན་པ་དྲག་ཏུ་འཁྲུངས་སོ། །

དེ་ནས་ཇི་ལྟར་བཞེས་པ་ལྟར་བྱོན་ཏེ། སོག་ཆུ་ཁར་ཕེབས་པ་ན་ཁང་པ་ཞིག་ན་ཀུ་དི་རི་འདུག་པས། འདི་ན་ཅི་ཡོད་དྲིས་པས། འཕྲང་ཁ་བེར་ཆུང་ཡབ་བེར་ཆེན་གྱི་འདེད་དང་སྲིན་པོ་རྣམས་བསྡུ་བའི་ཆང་ཡོད་པ་ཡིན་ཟེར་བས། ཐག་རིང་ནས་བྱོན་པས་དེར་སྐྱེམ་སྐྱུར་བྱོན་པ་ལ། འཕྲང་ཁ་བེར་ཆུང་གིས་ཁྱོད་ཆོས་གྲྭ་ནས་འོངས་པའི་དགེ་བསྙེན་ཞིག་འདུག་སྟེ། ང་ཡང་ཞང་འཕྲང་ཁ་བེར་ཆུང་བྱ་བའི་མི་ཆེན་ཞིག་ཡིན། ཁྱོད་ཀྱིས་དེ་ན་ཡར་ལ་ཕྱག་ཝ་འཁྱུག་པ་འདྲ་བ་ཞིག་གྱིས་ཟེར་བས། འབྲོམ་རིན་པོ་ཆེས་ཀྱང་དེ་བཞིན་དུ་མཛད།

དེར་བེར་ཆུང་ཆོས་གཏམ་ལ་དགའ་བས། ཆོས་གཏམ་མང་པོ་བྱ་བའི་ཚེ་འབྲོམ་གྱིས་ཁོང་གི་ཚིག་སྣ་རེ་ནས་བརྡུངས་པས་ཁོ་ཐེ་ཚོམ་སྐྱེས་ནས། ཁམས་མ་གི་ན་འབྲོམ་སྟོན་པ་ཟེར་བའི་དགེ་བསྙེན་ཆོས་མཁན་ཞིག་ཡོད་ཟེར། དེ་ཁྱོད་ཡིན་ནམ་ཟེར་བར། ཡིན་པའང་སྲིད་གསུངས་པས། ཁོང་ཧ་ལས་ཏེ་ཁོང་རང་གི་འོག་གི་གྲུམ་ཙེ་ཕྱུང་སྟེ་དགེ་བཤེས་སྟོན་པ་ལ་བཏིངས། རྟ་བཟང་པོ་གཅིག་གི་ཐུར་མདའ་དར་ཡུག་གིས་བྱས་ནས་ཕུལ། ད་ཅི་ནས་ཕྱག་བླངས་པའི་བཟོད་གསོལ་བྱས། དེ་ནས་བགྲོ་གླེང་བྱས་པའི་བཟོད་གསོལ་བྱས། རྭ་སྒྲེང་གི་ས་ཆ་འདིར་དགོན་ས་མཛད་དེ་མཆོད་གནས་མཛད་པར་ཞུས་པ་ན། འབྲོམ་རིན་པོ་ཆེའི་ཞལ་ནས། ང་ད་རེས་སྡོད་མི་ཁོམ། མངའ་རིས་སྟོད་ཡ་གིར་པཎྜི་ཏ་ཆེན་པོ་ཞིག་བྱོན་ཟེར་བས། དེར་འགྲོ་གསུངས། འོ་ན་ཡས་མར་ཕེབས་ནས་ངའི་མཆོད་གནས་བྱ་དགོས་ཟེར་བས། སྟོན་པའི་ཞལ་ནས། རྩིགས་ཁ་གསུམ་འཛིན་དགོས་ཏེ། སྟེར་ན་བྱ་གསུངས། གང་བཞེད་ཞུས་པས། ཕོད་མདོའི་མཁར་འདི་བཤིག་ལ་གཙུག་ལག་ཁང་ཞིག་བཞེངས། ཤ་ཟན་དང་རྩམ་ཟན་གྱི་འཁྲུག་པ་ནི་བསྡུམས། ངའི་ཕྱི་ནས་ཡར་ལ་རྔོག་ལེགས་པའི་ཤེས་རབ་བྱ་བ་འོང་གི་དེ་ལ་ཆོས་ཚུགས། དེ་མ་བྱུང་ན་གཡོན་རུ་ན་ཁུ་སྟོན་བློ་རྣོན་པོ་བྱ་བ་ཡོད། དེ་སྤྱན་དྲོངས་ལ་ཆོས་ཚུགས་གསུངས། ཁོང་ན་རེ་གཉིས་པོ་བྱས་པས་ཆོག །ཤ་ཟན་གྱི་འཁྲུག་པ་འདི་ལ་ང་རེ་བ་ཡིན། སྔར་ཡང་འབྲི་དྲུག་ཅུ་ཙམ་ཟོས་ཟིན། འོ་ན་ཡང་ཁམ་ཙམ་མེད། བསྡུམས་བྱས་པས་ཆོག་ཟེར་ནས་རྩིགས་གསུམ་པོ་ཁས་བླངས།

དེ་ནས་དགེ་བཤེས་སྟོན་པས་རྒྱལ་གྱི་ཞང་ཆེན་པོ་བསླབ་པའི་སློབ་དཔོན་ཡིན་པས་ཕྱག་འཚལ་དུ་བྱོན། དེའི་ཚེ་དབུས་ཕྱོགས་ན་དགེ་བཤེས་ཀ་བ་མི་ཆེ་བས་རྒྱ་མོའི་ཕུར་བཞུགས་པ་མཇལ། ལྷ་བཙུན་བོ་དྷི་རཱ་ཛ་ལ་སོགས་པ་བོད་ཀྱིས་མི་ཆེན་རྣམས་ལ་ཞེ་ས་མཛད་ནས། ད་ལྟ་མངའ་རིས་ན་ལྷ་བླ་མ་བྱང་ཆུབ་འོད་ཀྱིས་ཇོ་བོ་ལྷ་གཅིག་བྱ་བའི་པཎྜི་ཏ་མཁས་པ་ཞིག་གདན་དྲངས་ནས་ཡོད་ཟེར། ངས་དེ་གདན་འདྲོངས་ན་ཞལ་མཐོང་དང་བཅས་པའི་དབུལ་བ་གྱིས་ཤིག་པའི་ཞུ་བ་ཕུལ། ཀ་བ་ཤཱཀྱ་དབང་ཕྱུག་ལ་ཆབ་ཤོག་ཁྱེད་ཀྱི་ཕྱག་ཏུ་བརྫངས་ཀྱི། དེ་ཙ་ན་བསྐུལ་མ་གྱིས་ལ། ལ་སྟོད་དུ་བསུ་བར་སླེབ་པར་མཛོད་ཅིག་པའི་ཞུ་བ་ཕུལ་བས། ཀ་བ་ན་རེ། ཁྱོད་ཀྱིས་སྤྱན་ཅི་འདྲོངས་གྱིས། ངས་བསྐུལ་མ་བྱས་ནས། ལ་སྟོད་དུ་སླེབ་པར་བསུ་བ་བྱ་གསུངས།

དེ་ནས་མི་ཆོས་རྣམས་པ་གསེར་སློང་ལ་བྱོན་པས། ད་ལྟ་ཉུང་བ་ལས་མི་འོང༌། ཕྱིས་མང་དུ་དབུལ་ཞུས་པས། ཉུང་ཡང་ད་ལྟ་འདོད། པཎྜི་ཏ་ཅན་དུ་རིང་གསུངས། ཉུང་ཡང་བླངས་ཏེ། དེ་ནས་མི་གྲོང་མ་བརྒྱུད་པར་བྱང་ལམ་ལ་ཐེགས་པས། ལམ་ངོ་མ་ཤེས་པའི་སྐབས་སུ་བནྡེ་ཧྲལ་པོ་ཞིག་བྱུང་ནས་ལམ་བསྟན། ཡ་ཆེད་སྐྱེལ་ཐུང་བྱས་ནས་བདེ་བར་བཞུད་ཅིག །ད་སྣ་ཤུད་ཀྱི་འཁྲུག་པ་ལངས་པས་ང་འགྲོ་མི་ཁོམ་ཟེར་ནས་འཚུབ་མར་རེང་གིས་སོང༌། པེ་ཧར་འདི་ཡང་ཆོས་གཤའ་མར་བྱེད་པ་ལ་གྲོགས་བྱེད་པར་འདུག་གསུངས། ཡང་ལམ་མ་རྙེད་པ་ཞིག་ལ་ཤ་བ་ཞིག་སོང་བའི་རྗེས་ལ་བྱོན་པས་ལམ་ཏིག་གིས་བྱུང༌། དེ་ཇོ་མོ་སྒྲོལ་མའི་སྤྲུལ་པ་ཡིན་གསུངས།

དེ་ཙ་ན་ཇོ་བོ་རྗེ་ལ་རྗེ་བཙུན་སྒྲོལ་མའི་ཞལ་ནས། ད་སྟེ་ཞག་གསུམ་དྲོ་དང་བཞིའི་ཉིན་པར་བོད་ཀྱི་ཨུ་པ་སི་ཀ་ཆེན་པོ་འབྱོན་པས། དེ་ལ་བྱིན་གྱིས་རློབས་ཤིག་ཅེས་ལུང་བསྟན། ཇོ་བོ་ཉིད་ཀྱིས་ཀྱང་དེ་ལྟར་དུ་དགོངས་ཏེ། ཇོ་བོའི་ཞལ་ནས། ད་ཞག་གསུམ་དྲོ་དང་བཞི་ན་ཁོ་བོའི་སྐྱེ་བ་སྔ་མའི་སློབ་མ་ཨུ་པ་སི་ཀ་ཆེན་པོ། ཞྭ་སྤྱི་རིང་རྒྱང་ངེ་བ་གསོལ་པ་ཞིག་འོང་བར་འདུག་གསུངས་ནས། དབུ་སྔས་འགོར་བུམ་པ་བཞེངས་སུ་གསོལ་ཏེ། ཞག་གསུམ་གྱི་ནང་པར་ཨུ་པ་སི་ཀ་ལ་བྱ་ར་མཛད། དྲོ་ཁ་ཚུན་ཆད་མ་བྱོན་པས། ཏཱ་རེ་རྫུན་ནི་གསུང་བ་ཅང་སྲིད་དམ་གསུངས་ནས། གྲོང་གསེབ་ཅིག་ཏུ་ཆོས་སྟོན་ལ་བྱོན་པའི་ཤུལ་དང་། དགེ་བཤེས་སྟོན་པ་དཔོན་གཡོག་ཕེབས་པ་ལ། འཁོར་ཀུན་གྱིས་ད་ལྟ་རང་འབྱོན་པས་བཞུགས་ཤིག་བྱས་པ་ལ། ང་ཐེག་པ་ཆེན་པོའི་བླ་མ་དང་མཇལ་བ་སྐད་ཅིག་མ་སྔ་མ་དང་ཕྱི་མ་གཉིས་ལས་སྔ་མ་ལ་འདམ་པ་ཡིན་གསུངས་ནས་བཞུད་པས། ཇོ་བོ་དང་སྲང་བར་ཞིག་ཏུ་མཇལ་ཏེ་ཕྱག་མཛད་ནས། ཕྱག་རྟེན་དུ་གསེར་ཕུལ། དེར་ཇོ་བོའི་ཕྱག་སྟོན་པའི་དབུ་ཐོག་ཏུ་བཞག་ནས། སཾ་སྐྲྀ་ཏའི་སྐད་དུ་ཤིས་བརྗོད་མཛད་ཅིང་བྱིན་གྱིས་བརླབས་སོ། །

དེ་ནས་འབྲོམ་རིན་པོ་ཆེས་གསོལ་བ་བཞེས་ནས། ཇོ་བོའི་གཟིམ་ཁང་དུ་བྱོན་པ་ན། ཇོ་བོ་རྗེས་བུམ་པ་དབུ་ཐོག་ཏུ་བཞག་སྟེ་དབང་བསྐུར་ཡང་ལེགས་པར་གནང༌། དེའི་ཚེ་དགེ་བཤེས་སྟོན་པས་ཇོ་བོ་ལ་དྲི་བ་གསུམ་མཛད། རྒྱ་གར་ན་པཎྜི་ཏ་ཇི་ལྟ་བུ་ཡོད་བྱ་བ་དང༌། ངའི་སྔ་མའི་ཆོས་དེ་ལམ་དུ་སོང་ངམ་མ་སོང་བྱ་བ་དང༌། བླ་མ་ཉིད་ཀྱི་སྤྱན་སྔར་བསྡད་ན་ཇི་ལྟར་མཆི་བྱ་བ་དང་གསུམ་ཞུས་པས། ཇོ་བོའི་ཞལ་ནས་རྒྱ་གར་ན་པཎྜི་ཏ་མཁས་པ་མང་པོ་ཡོད། ང་བོད་དུ་འོང་ཙ་ན་ཤར་ཕྱོགས་བྷཾ་ག་ལ་ནའང་ཉིན་རེ་མ་ཆད་པར་གྲུབ་ཐོབ་རེ་འབྱོན་གྱི་ཡོད། ཁྱོད་ཀྱི་སྔ་མའི་ཆོས་དེ་ལམ་དུ་ཡེ་མ་སོང༌། བླ་མའི་ཞབས་ཏོག་ལམ་དུ་སོང༌། ད་ཁྱོད་འདི་རང་དུ་སྡོད། ངའི་ལྷ་མོ་སྒྲོལ་མས་ཁྱོད་ལུང་བསྟན་པ་ཡིན་གྱི་ངའི་བཀའ་བརྒྱུད་འདི་ལ་བྱིན་རླབས་ཡོད་ཀྱི་གསུངས།

དེའི་ཉིན་པར་གྱི་ཡོན་བདག་དེས་སྟོན་སྐལ་གྱི་མར་ཚལ་གཅིག་བྱིན་པ་དེ་བཞུ་ནས། དེའི་ནུབ་མོ་མར་མེ་མཚན་ཐུབ་ཅིག་དབུ་སྔས་སུ་བཞག །དེ་ནས་ཇོ་བོ་ཞིང་གཤེགས་ཀྱི་བར་དང༌། གཤེགས་ནས་ཀྱང་རྭ་སྒྲེང་དུ་སྐུ་གདུང་ལ་དཀར་མེ་མཚན་ཐུབ་རྒྱུན་མ་ཆད་པར་འབུལ་བར་མཛད། དེ་ནས་ཕལ་ཆེན་སྡེ་པའི་ལུགས་ཀྱི་རས་ཡོལ་གྱིས་ནུབ་ལྷག་ཐུབ་པར་འདོད་པས། དེའི་ནུབ་མོ་ནས་དབུ་སྔས་སྦྲེལ་ནས་ཆོས་རྒྱུན་དུ་གསན་པར་མཛད། སང་ནངས་པར་དགེ་བཤེས་སྟོན་པ་ལ་ཆེད་དུ་དགོངས་ནས་བྱང་ཆུབ་ལམ་གྱི་སྒྲོན་མ་ལ་ཆོས་ཐུན་གཅིག་མཛད་དེ་ཚར་གཅིག་གསུངས། དེ་ནས་བཟུང་སྟེ་ཆོས་གང་གསན་ཐམས་ཅད་སྐྱེས་བུ་གསུམ་གྱི་ལམ་གྱི་རིམ་པའི་སྟེང་དུ་འབབ་པར་མཛད།

འབྲོམ་རིན་པོ་ཆེས་ཇོ་བོ་རྒྱ་གར་དུ་ཞག་གསུམ་ན་ཐེགས་པ་ལ་སླེབས་ནས། བོད་དུ་བཞུགས་པར་ཞུ་བ་ཕུལ་བས། ཇོ་བོའི་ཞལ་ནས། གྲགས་པ་ངན་པ་སྤོང་མི་བྱེད་བྱ་བ་བྱང་ཆུབ་སེམས་དཔའི་ཉེས་པ་ཡིན་པས། རྒྱ་གར་དུ་འགྲོ་གསུངས་ནས་མ་གནང༌། དེའི་དུས་སུ་རྒྱ་གར་ན་ཇོ་བོ་ཙམ་པ་ཡང་གསེར་ལ་དམིགས་ནས་བོད་དུ་སོང་བྱ་བ་དང༌། བོད་བ་ལང་དང་འདྲ་བའི་གསེབ་ན་ཆོས་ཐམས་ཅད་སྟོང་པ་ཉིད་ཡིན་ཟེར་ཞིང་འདུག་ལོ་བྱ་བ་དང༌། གསང་སྔགས་མ་རྒྱུད་ཀྱིས་འགྲོ་བའི་དོན་མཛད་ཀྱི་འདུག་ལོ་བྱ་བའི་གྲགས་པ་བྱུང་བས། དེ་རྣམས་བསལ་བའི་ཆེད་དུ་ཇོ་བོ་ཉིད་ཀྱང་རྒྱ་གར་དུ་བྱོན་པར་དགོངས་པ་ལྟར་མཛད།

དེའི་ཚེ་འབྲོམ་རིན་པོ་ཆེས་ཇོ་བོ་བོད་དུ་འབྱོན་པར་བསྐུལ་བའི་ཕྱིར་དུ། ཐབས་མཁས་ཀྱིས་ངེད་ཀྱི་ལྷ་ས་དང་བསམ་ཡས་ལ་སོགས་པའི་གཙུག་ལག་ཁང་ན། སློབ་དཔོན་བོ་དྷི་ས་ཏྭ་དང་། ཀ་མ་ལ་ཤཱི་ལ་ལ་སོགས་པས་གདན་དྲངས་པའི་རྒྱ་དཔེ་མང་པོ་དང་། ཇོ་བོ་ཤཱཀྱ་མུ་ནེ་སོགས་རྟེན་ཁྱད་པར་ཅན་མང་དུ་བཞུགས་ཤིང་། དགེ་འདུན་སྟོང་ཕྲག་འདི་ཙམ་བཞུགས་པ་སོགས་ཀྱི་ལོ་རྒྱུས་མང་པོ་སྙན་དུ་གསོལ། དེ་ཐམས་ཅད་ཀྱང་ཇོ་བོ་བོད་དུ་བྱོན་པ་ལ་དགྱེས་པ་ལགས་ཞུས་པས། ཇོ་བོ་ཤིན་ཏུ་དགྱེས་ནས་སྙིགས་མའི་དུས་སུ་ཚངས་པར་སྤྱོད་པ་གྲངས་མང་བ་དེ་ཙམ་པ་རྒྱ་གར་ནའང་མི་བཞུགས། དེ་ཙམ་བཞུགས་ན་ངེས་པ་ཁོ་ནར་དགྲ་བཅོམ་པ་ཡང་བཞུགས་ཏེ་མཆི་གསུངས། བྱིན་པ་འདར་ཕྲིལ་ཕྲིལ་བོད་ཀྱི་ཕྱོགས་སུ་ཕྱག་མཛད། དེ་ཐམས་ཅད་ཀྱང་ཁོ་བོ་འོང་བ་ལ་དགའ་བ་ཡིན་ན། ངས་དགེ་འདུན་གྱི་ཆོས་ལྡན་གྱི་ངག་མི་གཅོག་པར་དམ་བཅས་པ་ཡིན་གསུངས་པས། འབྲོམ་རིན་པོ་ཆེ་སྤོབས་པ་སྐྱེས་ནས་ཇོ་བོ་ལ་བོད་དུ་འབྱོན་པར་ཞུ་བ་ཕུལ། ཇོ་བོས་ཀྱང་ཞལ་གྱིས་བཞེས་པ་ལགས།

དགེ་བཤེས་ལོ་ཙཱ་བའི་ཞལ་ནས། ངས་དམྱལ་བར་འགྲོ་མི་ནུས། སློབ་དཔོན་གནས་བརྟན་དང་ཆད་དོན་ཡོད་པ་ཐུགས་ལ་མངའ་མོད་གསུངས་པས། བོད་དུ་བཞུགས་དབང་མ་བྱུང༌། ཇོ་བོའི་ཞལ་ནས། དང་པོ་ཚུར་ལ་སྤྱན་མ་འདྲོངས་དོགས། དེ་ནས་ཕར་ལ་སྤྱན་མ་འདྲོངས་དོགས། ངས་ལོ་ཙཱ་བ་སྦྱོང་བྱ་བའི་ཞལ་ཀྱལ་ཡང་གསུངས།

དེར་འབྲོམ་རིན་པོ་ཆེའི་ཐུགས་དགོངས་ལ། བོད་ཀྱི་མི་ཆེན་རྣམས་གྲོགས་སུ་སྦྲན་ལ་སྤྱན་དྲངས་དགོས་དགོངས་ནས། བཀའ་འཕྲིན་བརྫངས་པ་ནི། ཤིང་རྟའི་དབྱིབས་འདྲ་འཛམ་གླིང་གི །ཕྱེ་བྲག་བརྗིད་ལྡན་གངས་རིའི་བྱང༌། །ལོ་ཧི་ཏ་འགྲམ་རིན་ཆེན་ཁུངས། །ཁ་བ་ཅན་ཞེས་མིང་གྲགས་ན། །བློ་ཆེན་སྟོབས་ལྡན་མི་བསྲུན་པ། །བོད་ཅེས་བྱ་བ་གནས་པའི་ཕྱིར། །མི་རྒྱལ་བྱང་ཆུབ་སེམས་དཔའ་ཆེ། །དཔའ་ཆེན་མང་པོ་འཁོར་བཅས་ཀྱིས། །སྨན་གདགས་ཐབས་སུ་དམ་ཆོས་བསྒྱུར། །རྒྱུ་བཟང་བཀོད་ལེགས་གཙུག་ལག་ཁང༌། །བསམ་ཡས་ལ་སོགས་གནས་མཆོག་ན། །སྔོན་རྒྱལ་འཕྲུལ་རྗེའི་དགོངས་བཀང་ཕྱིར། །བསྟན་པ་བདུད་རྩི་རྒྱས་མཛད་ཅིང༌། །རྒྱལ་སྲས་འདྲེན་པ་དཀྱེལ་ཆེ་བ། །མི་ཡི་རྒྱལ་པོ་ཤཱཀྱའི་སྲས། །ལྷ་བཙུན་བོ་དྷི་རཱ་ཛ་དང༌། །དང་པོའི་དགེ་སློང་ལུགས་འབྱིན་དཔོན། །བཙུན་ཆེན་ཡེ་ཤེས་བློ་གྲོས་དང༌། །ཐེག་ཆེན་གདུང་བརྒྱུད་བརྟན་མཛད་པའི། །ཐེག་ཆེན་ཀ་བ་རྣམ་གསུམ་དང༌། །མིག་འབྱེད་དགེ་བཤེས་རྣམ་གཉིས་ཀྱི། །རྗེས་སློབ་དཔལ་ལྡན་བཅུ་གཉིས་དང༌། །ཆོས་འཁོར་ཁྲིམས་བཞིན་སྐྱོང་མཛད་པའི། །རིང་ལུགས་ཆེན་པོ་གཉིས་པོ་དང༌། །ཆོས་གྲྭའི་སློབ་དཔོན་ཐུགས་རྒྱལ་ཅན། །ཀ་བ་གར་མི་མཆེད་གཉིས་དང༌། །དགེ་བཤེས་ཆེ་རྣམས་དགོངས་སྐྱོང་པའི། །ཀུན་ཕན་དབང་ཕྱུག་རྒྱལ་མཚན་དང༌། །གནས་བརྟན་བན་སྐྱའི་རེ་གནས་པ། །ཤཱཀ་གཞོན་རྒྱལ་བའི་སྲས་གཉིས་དང༌། །མཁས་བཙུན་ཆེན་པོར་སྙན་གྲགས་པ། །ལེགས་པའི་ཤེས་རབ་ལ་སོགས་པའི། །འཕགས་པའི་དགེ་སློང་དགེ་འདུན་ཆེ། །སློབ་མ་ཡོན་བདག་འཁོར་བཅས་ལ། །དགེ་བསྙེན་རྒྱལ་བའི་འབྱུང་གནས་ཀྱིས། །གུས་པས་སྔོན་འགྲོའི་མཆེད་གསོལ་པ། །ཁྱེད་ཀྱི་བྱང་ཆུབ་སྤྱོད་པ་ལ། །བར་ཆད་མི་བདེ་མི་མངའ་འམ། །མདོར་བསྡུས་གཅེས་པའི་དོན་གསོལ་བ། །རྒྱ་གར་ཡུལ་གྱི་མཁས་བཙུན་མཆོག །ཡོན་ཏན་མཐའ་ཡས་རྒྱས་མངའ་ཞིང༌། །ཡེ་ཤེས་མཐའ་ཅན་མཚན་ལྡན་པའི། །མཁས་པ་ཆེན་པོ་འདིར་བྱོན་པ། །ཁྱེད་ཀྱིས་ལོ་རྒྱུས་མཁྱེན་པ་ལགས། །དེ་ལ་དངོས་ཉིད་དད་འཁྲུངས་ནས། །ལྷ་བཙུན་བཀའ་སྩལ་མཆིས་པ་ཡིས། །སྔར་ནི་དབུས་སུ་གཤེགས་ཞུས་ནས། །ཕར་རིངས་གསུངས་ནས་བཀའ་མ་གནང༌། །སླད་ནས་བལ་ཡུལ་ཤུལ་ཁ་ནས། །དབུས་ཀྱི་དགེ་འདུན་རྒྱུས་གསོལ་བས། །དད་ནས་ཕྱག་འཚལ་དགྱེས་གྱུར་ཏེ། །ཚངས་སྤྱོད་གྲངས་མང་དེ་ལྟ་བུ། །རྒྱ་གར་ཡུལ་ནའང་དཀོན་ཞེས་གསུངས། །དེས་ཀྱང་དངོས་ཉིད་སྤོབས་སྐྱེས་ཏེ། །ཁྱེད་ཀྱང་དད་པར་ཁུམས་ལགས་པས། །ཡང་དང་ཡང་དུ་ཞུས་པ་ལས། །ང་ཡི་དགེ་འདུན་དོན་སྒྲུབ་ཅིང༌། །བཀའ་མི་གཅོག་པར་དམ་བཅས་ཕྱིར། །དགེ་འདུན་དག་ལ་གྲོས་ཡོད་ཅིང༌། །སྤྱན་འདྲེན་འོང་ན་འགྲོ་གསུངས་བས། །དགེ་སློང་གཞོན་ནུ་བློ་རྣོན་པོ། །ལོ་ཙཱ་སྨན་ཐོགས་གཅིག་མཆིས་ན། །ཁྱེད་ཅག་དམ་ཆོས་དོན་གཉེར་རྣམས། །མོས་ཤིང་བཀའ་གྲོས་མཐུན་པ་ན། །སྤྱི་སྒོས་གང་བདེའི་སྤྱ་འདྲེན་པ། །དགེ་སློང་རྟ་མང་ཞལ་མཐོང་བཅས། །སྟོན་དུས་ཚུན་ཆད་འདིར་བྱོན་མཛོད། །བྱ་བ་དང༌། གཞན་ཡང་བདག་གིས་དགྲར་རྟེན་སྔགས་དང་འཁྲུལ་པའི་རྒྱུ་གཞན་གྱིས། །ཚུལ་ཁྲིམས་ཉམས་སོགས་ཉེས་མཐོང་དེའི་ཕྱིར་བདག་གི་ཕན་བསམ་སྤྲིངས། །མོས་པ་སྣ་ཚོགས་མཆིས་པས་འདི་ལ་མི་དགེ་གང༌། །རང་འདོད་གཙོ་བོར་མ་འཛིན་ཐུགས་གཞིགས་གཟོད་པར་མཛོད། །དོན་ལྡན་ཡོན་ཏན་བརྗོད་པའི་མཚན་གྱི་སྔོན་འགྲོ་བ། །ཤཱཀྱའི་དགེ་སློང་དགེ་འདུན་རྣམས་ཀྱི་སྤྱན་ལམ་དུ། །ཀུན་ལ་ཕན་བསམ་དགེ་བས་ཡི་གེ་འདི་བསྡེབས་པའི། །དགེ་བས་དགོངས་གྲུབ་ལེགས་པའི་དཔལ་འབྱུང་དོན་ལྡན་ཆེར་རྒྱས་སྨོན། །བྱ་བའི་ཆབ་ཤོག་དབང་ཕྱུག་མགོན་ལ་བརྫངས་ནས། དགེ་བཤེས་ཀ་བའི་ཕྱག་ཏུ་གཏད་དོ། །

དེ་ནས་འབྲོམ་རིན་པོ་ཆེས་དཔོན་གཡོག་གཤེགས་པའི་ཕྱག་ཕྱིར་བྱོན་ཏེ། བོད་སྟོན་རྣམས་འབྱོན་དུ་རེ་ནས་ཅི་འགོར་མཛད། ལོ་ཙཱ་བས་ཕར་ལ་ཅི་མགྱོགས་མཛད་དོ། །དེར་བོད་སྟོན་རྣམས་མ་སླེབ་པར་ཇོ་བོ་དཔོན་གཡོག་མང་ཡུལ་སྐྱིད་གྲོང་དུ་ཕེབས།

དེ་ནས་བལ་པོ་རྫོང་བརྒྱུད་དེ། རྒྱ་གར་དུ་ཕེབས་པར་ཆས་པ་ལྟར་མཛད་པ་ན། ས་མན་སྡེ་གསུམ་བྱ་བའི་འཁྲུག་པ་ལངས་ནས་བལ་པོ་རྫོང་འགགས་པས་མ་ཐོན། དེ་བོད་ཀྱི་བསོད་ནམས་སུ་བྱུང་བ་ལགས། དེར་དགེ་བཤེས་ལོ་ཙཱ་བ་དེ་ཐུགས་ཤིན་ཏུ་མ་བདེ་བ། ཇོ་བོའི་ཞལ་ནས། ཁྱོད་བློ་མི་བདེ་བ་མི་དགོས། སྒྲུབ་པར་མ་ནུས་པ་ལ་ཉེས་པ་གཏན་མེད་པ་ཡིན་གསུངས། དེར་ལོ་ཙཱ་དགྱེས་ཏེ། ད་འོ་ན་བོད་དུ་འབྱོན་པར་ཞུ་ཟེར་ནས། བོད་དུ་སྤྱན་དྲངས་སོ། །

དེའི་དུས་སུ་གསེར་ཀོ་གཏུམ་ཞིག་དང་། ལམ་སྒྲོན་ཇོ་བོའི་ཕྱག་བྲིས་ཡིན་པ་ཞིག་པུ་རངས་པའི་བནྡེ་གཉིས་ལ་བསྐུར་ནས། གསེར་འདི་སློབ་དཔོན་གནས་བརྟན་ལ་ཕུལ་ལ། ད་རེས་ཇོ་བོ་གདན་དྲངས་པ་ཡིན་ཏེ། བལ་པོའི་ལམ་འགགས་ནས་ཕྱིར་ལོག །ད་སྤྱན་དྲོངས་གསུངས་ན་ཡང་སྤྱན་འདྲེན། ཇོ་བོ་ཡང་བོད་ལ་མཉེས་ཤིང་། འགྲོ་དོན་ཡང་ཆེན་པོ་འདུག་པས། བཞུགས་ཆོག་གམ་བྱ་བ་དང༌། བསྟན་བཅོས་འདི་བི་ཀ་མ་ལ་ཤཱི་ལའི་པཎྜི་ཏ་རྣམས་ལ་གཟིགས་སུ་ཕུལ་ཅིག་པའི་འཕྲིན་བསྐུར་བཏང་བས། གཉིས་པོས་ཀྱང་ལམ་ལ་ཉེ་ཞོ་མེད་པར། བི་ཀ་མ་ལ་ཤཱི་ལར་སླེབ་སྟེ། གནས་བརྟན་དཀོན་མཆོག་འབྱུང་གནས་ལ་གསེར་རྣམས་ཕུལ། ཇོ་བོའི་ལོ་རྒྱུས་དང་། ལོ་ཙཱ་བའི་འཕྲིན་རྒྱས་པར་གསོལ།

བསྟན་བཅོས་དེ་པཎྜི་ཏ་རྣམས་ལ་གཟིགས་སུ་ཕུལ་བས། ནན་ཏར་མཉེས་ནས་བསྟན་བཅོས་འདི་ལེགས། ཡི་གེ་ཕྱག་བྲིས་མ་ནོར་བར་འདུག་གསུངས་ཏེ། རྒྱལ་མཚན་གྱི་རྩེ་ལ་བཏགས་ནས། ཞག་ཉི་ཤུ་རྩ་གཅིག་ཏུ་མཆོད་པ་རྒྱ་ཆེན་པོ་མཛད། དེར་གནས་བརྟན་གྱི་ཞལ་ནས། ཇོ་བོ་འབྱོན་དུ་རེ་བ་ཡིན་ཏེ། ཆོས་འདི་ཕེབས་པས་ཇོ་བོ་དང་ཁྱད་མེད། དེ་ཇོ་བོ་བོད་ན་འགྲོ་དོན་ཆེ་བ་དེ་ལྷག་པར་དགའ། ཇོ་བོ་བོད་ལ་དང་པོ་ནས་ཉེས་པ་ང་རང་ལ་རྒྱུས་ཡོད། ད་སྐུ་ན་སོ་བྱོན་པས་བཤུལ་ཐག་རིང་པོ་ལ་ཚུར་སྤྱན་མ་དྲངས་པར། བསྟན་བཅོས་འདི་ལ་འགྲེལ་པ་ཞིག་མཛད་ནས་བསྐུར་བ་ཞུ་གསུངས་ནས། གཉིས་པོ་ཚུར་བཏང༌། ཁོང་གཉིས་པོས་ཀྱང་ཚུར་འཁོར་ནས་ཇོ་བོ་དཔོན་གཡོག་ལ་ཞུ་འཕྲིན་སྙན་དུ་གསོལ་བས། ནན་ཏར་མཉེས་ཤིང༌། ཁྱད་པར་ལོ་ཙཱ་བའི་ཞལ་ནས། སློབ་དཔོན་གནས་བརྟན་གྱིས་རི་བས་ཀྱང་ལྕི་བའི་ཁུར་གཅིག་བསྐུར་བ་དེ་ད་སངས་ཀྱིས་སོང་གསུངས། ཇོ་བོས་ཀྱང་དེ་འཕྲལ་དུ་འགྲེལ་པའི་དབུ་བཙུགས་ནས་དཀའ་འགྲེལ་ཞིག་མཛད་དེ། སླར་ཁོང་གཉིས་པོ་ལ་བསྐུར་བས་པཎྜི་ཏ་རྣམས་ཀྱིས་ཉིན་ལམ་མང་པོ་ནས་བསུ་བ་བྱས། རྒྱལ་མཚན་གྱི་རྩེར་བཏགས་ནས་མཆོད་པ་ཆེན་པོ་མཛད་དོ། །

དེ་ཡང༌། དེང་སང་བསྟན་འགྱུར་ནང་ན་ལམ་སྒྲོན་རང་འགྲེལ་ཞེས་གྲགས་པ་འདི་ལ་ཇོ་བོས་མཛད་ངེས་པ་དང༌། ཇོ་བོས་མ་མཛད་པར་གཞན་གྱི་གསར་དུ་བསྣན་པའི་ཆ་གཉིས་ཡོད་དེ། རྒྱ་གར་གྱི་པཎྜི་ཏ་རྣམས་ཀྱིས་བསྐུལ་བ་ལྟར། ཇོ་བོས་ལམ་སྒྲོན་ལ་རང་འགྲེལ་མདོར་བསྡུས་ཤིག་མཛད་ནས་རྒྱ་གར་དུ་བརྫངས། དེ་ལ་ཇོ་བོའི་སློབ་མ་བོད་སྟོན་མཁས་པ་འགའ་ཞིག་གིས་ཇོ་བོའི་གསུང་སྒྲོས་ལ་གཞི་བླངས་པའི་བཤད་པ་རེ་མང་ཞིག་བསྣན་པར་སྣང་སྟེ། དེ་ལ་ལེགས་པར་བཤད་པའང་མང་དུ་བྱུང་མོད་ཀྱི། ནོར་བར་མངོན་པ་འགའ་ཞིག་ཀྱང་བྱུང་ངོ་ཞེས་རྗེ་བདག་ཉིད་ཆེན་པོས་གསུངས་སོ། །

དེ་ལྟར་བླ་མ་རྗེ་བཙུན་ཆེན་པོ་འདིས་རྒྱ་གར་དུ་བཞུད་པ་བཞིན་དུ་མཛད། ལོ་ཙཱ་བས་སྐྱེལ་བ་བཞིན་མཛད་ཀྱང་། བོད་རང་དུ་བཞུགས་པའི་རྒྱུ་མཚན་ནི་དང་པོ་ནས་ངེས་པ་ཡིན་ཏེ། ཁྱོད་སྔོན་སོ་མ་པུ་རི་ན། །རྟོག་གེ་འབར་བ་གསུངས་པའི་ཚེ། །ད་ནི་ལོ་ནི་ཉི་ཤུ་ན། །ཚེ་ཡི་འདུ་བྱེད་གཏོང་ཞེས་གསུངས། །དེ་ནས་ལོ་གཉིས་ལོན་པ་ན། །བོད་དུ་འབྱོན་ཁའི་དུས་སུ་ནི། །བི་ཀ་མ་ལ་ཤཱི་ལར་ནི། །ད་ནི་ལོ་ནི་བཅོ་བརྒྱད་ན། །ཚེ་ཡི་འདུ་བྱེད་བཏང་ནས་སུ། །ལུས་འདི་བོད་དུ་འཇོག་གོ་གསུངས། །ཇི་སྐད་གསུང་བཞིན་མ་འཁྲུལ་པར། །བྱུང་བ་དེ་ནི་ངོ་མཚར་ཆེ། །ཞེས་གསུངས་པ་ལྟར་རོ། །

དགེ་བའི་བཤེས་གཉེན་ཤ་ར་བའི་ཞལ་ནས། ཇོ་བོ་བོད་དུ་བཞུགས་པར་རྒྱ་གར་རང་ནས་ངེས་པ། དཔེ་ཆ་དང་ཐུགས་དམ་གྱི་ལྷ་མ་ལུས་པ་སྤྱན་འདྲེན་ལུགས་དེས་ཀྱང་ཤེས་གསུངས་སོ། །

འབྲོམ་རིན་པོ་ཆེ་ཐུགས་དགོངས་བཟང་བ་དང༌། དེ་དུས་ཀྱི་མི་རྣམས་ཀྱང་བསམ་པ་བཟང་བས། བོད་ཀྱི་མི་ཆེན་རྣམས་ཀྱིས་ཀྱང་སོ་སོ་ནས་གསེར་དང་རྟ་ལ་སོགས་པའི་ཁྲལ་བཀྲལ་ནས། བོད་ཀྱི་དབུས་གཙང་གི་མི་ཆེན་ཐམས་ཅད་ཀྱིས་ཇོ་བོ་རྗེ་བསུ་བ་ལ་བྱོན། དེའི་ཚེ་བོད་སྟོན་རྣམས་འབྱོན་པ་ལ། ཇོ་བོས་ཉིན་རེ་བཞིན་བྱ་ར་མཛད་ཙ་ན། བོད་སྟོན་རྣམས་ཀྱིས་ཚག་ཞུ་དག་བེར་གྱོན། རྟ་ལ་ཆིབས་བྱོན་པས། ཇོ་བོས་གཟིགས་མ་ཐག །ཨུ་པ་སི་ཀ །མི་མ་ཡིན་མང་པོ་བྱུང་ངོ་གསུངས་ནས། དབུ་རིལ་གྱི་གཏུམས། དེ་ནས་བོད་ཀྱི་མི་ཆེན་རྣམས་ཀྱིས་ཆོས་གོས་གྱོན། སེར་སྦྲེང་མཛད་ནས་ཕྱག་རྟེན་ཕུལ་བས། ཇོ་བོ་ཡང་དགྱེས་ནས་ཕྱག་ལན་མང་པོ་མཛད། དེ་ནས་ཇོ་བོ་རྗེ་དཔོན་གཡོག་ལ་བོད་སྟོན་རྣམས་ཀྱིས་སྣ་ལེན་དུ་བསྙེན་བཀུར་བཟང་པོ་ཞིག་མཛད་པས། རྒྱ་གར་གྱི་རབ་ཏུ་བྱུང་བ་བས་བོད་ཀྱི་རབ་བྱུང་འཚོ་བ་བཟང་བར་འདུག་གསུངས།

དེ་ནས་གཙང་ལ་སྟོད་ལྡོག་གི་ཚ་སྣ་བྱ་བར་དོ་ཧ་རྡོ་རྗེའི་མགུར་གསུངས་པས། འབྲོམ་རིན་པོ་ཆེས་བོད་དུ་འདི་མི་ལེགས། བསྐལ་པ་སྙིགས་པས་སྡོམ་པ་བསྲུང་བ་དང་། ཚོགས་གསོག་པ་མི་མཆི། ལས་རྒྱུ་འབྲས་ལ་སོགས་པ་བསྟན་པ་སྤྱི་ལ་ཕན་པའི་ཆོས་གསུང་བར་ཞུས་པས། ཨ་ཏི་ཤ་ཡང་ཤིན་ཏུ་མཉེས་ཏེ། སེམས་ཅན་ཆེན་པོ་ཁྱེད་ལྟ་བུ་བོད་ན་བཞུགས་པ་བོད་བསོད་ནམས་ཆེ་ཡི། ཁོ་བོས་ཁྱོད་རྒྱ་གར་དུ་ཐོས་ན་བོད་དུ་འོང་མི་དགོས་པ་འདུག་པ་ལ་གསུངས།

སྣེའུ་ཟུར་པའི་ཞལ་ནས། འུ་ཅག་ཡིན་ན་གཞན་སུ་ལའང་མེད་པའི་ཆོས་ཤིག་ཁོ་ན་ཞུ། དགེ་བཤེས་སྟོན་པ་དེ་ཐུགས་དགོངས་ཤིན་ཏུ་བཟང་བས། བོད་སྤྱི་ལ་ཕན་ཆེ་བའི་ཆོས་ཤིག་ཁོ་ན་ཞུ་བར་ལགས་པར་གདའ་གསུངས།

དེ་ནས་གཙང་རོང་ན་མར་བྱོན་ཙ་ན། ཁང་པ་དོག་པས་གནས་ཁང་འདོད་རིགས་མ་རྙེད་པ་ལ། འབྲོམ་རིན་པོ་ཆེས་ཇོ་བོ་ཕྱིར་བཞུགས་སུ་བཅུག་ནས། དེའི་བར་དུ་ཁང་པའི་གད་བདར་བྱས། ཇོ་བོའི་དབུ་སྔས་སུ་མཎྜལ་ཞིག་ཀྱང་ཚང་པར་བྱས་འདུག་པས། ཇོ་བོའི་ཞལ་ནས། ང་ལ་སློབ་མ་ཁྱོད་འདྲ་བ་གཅིག་རྒྱ་གར་ནའང་ཡོད་གསུངས། པོ་ཏོ་བའི་ཞལ་ནས་དོན་ལ་མེད། ཡོད་ན་ཁ་སྐད་འདྲ་བ་འོང་ཐང་བ་ལ་གསུངས་སོ། །

དེ་ལྟར་འབྲོམ་རིན་པོ་ཆེས་ཇོ་བོ་རྗེ་མཉེས་པ་གསུམ་གྱི་སྒོ་ནས་མཉེས་པར་མཛད་ཅིང༌། ལྷག་པར་ཡེར་པ་ལྷ་རི་སྙིང་པོའི་མགུལ་དུ་ལོ་གསུམ་གྱི་རིང་ལ་ཇོ་བོ་རྗེ་རྙེད་པ་དང་བཀུར་སྟི་ཚད་མེད་པས་མཆོད་ཅིང༌། སྡིག་པ་ཅན་གྱི་སྐྱེ་བོས་དབེན་པར་བྱས་ཏེ། བྱང་ཆུབ་ལམ་གྱི་རིམ་པའི་འགོ་བཤེས་གཉེན་བསྟེན་ཚུལ་ནས། མཐར་འབྲས་བུ་མི་སློབ་པའི་ཟུང་འཇུག་འགྲུབ་པའི་བར། ལམ་སོ་སོའི་ངོ་བོ་གང་ཡིན་པ་དང༌། ལམ་དེ་དང་དེ་རྒྱུད་ལ་བསྐྱེད་པ་ལ། རྒྱུ་ཚོགས་གང་དང་གང་ཞིག་དགོས་པ་དང༌། དང་པོར་གང་ཉམས་སུ་བླང་བར་བྱ་བ། དེ་ནས་རིམ་གྱིས་རིམ་གྱིས་བསྒྲུབ་དགོས་པའི་གོ་རིམ་ངེས་པ་དང༌། ལམ་དེ་དང་དེ་དག་སྒྲུབ་པ་ལ་གེགས་ཇི་ལྟ་བུ་འབྱུང་བ་དང༌། ལམ་དེ་དང་དེ་དག་སྟོན་པའི་བླ་མ་དང་སློབ་མ་ཇི་ལྟ་བུ་ཞིག་དགོས་པ་དང༌། ཡི་དམ་གང་ལ་བྱ་དགོས་པ་སོགས་མཐའ་དག་པར་ཞུས་ཤིང་། ཉིན་རེ་བཞིན་དུ་དྲི་གཏུགས་དང་བརྒལ་བརྟག་མང་དུ་མཛད་དེ་གཏན་ལ་ཕབ།

དེའི་ཚེ་འབྲོམ་རིན་པོ་ཆེས་ལམ་གྱི་གནད་མཐར་ཐུག་པ་འདི་དག་ཁོང་གཞན་འགའ་ཞིག་ལའང་གནང་ན་ལེགས་པ་ལ། གཞན་སུ་ལའང་མི་གནང་བར། ཁོ་བོ་གཅིག་པུ་ལ་གནང་བ་ཅི་ཡིན་ཞེས་ཞུས་པ་ན། ཇོ་བོའི་ཞལ་ནས་ངས་ཁྱོད་མིན་པ་གཞན་ལ་གཏད་ས་མ་རྙེད་པ་ཡིན་གསུངས། ཚུལ་འདི་དག་ལ་བློ་གྲོས་ཅན་རྣམས་ཀྱིས་ལེགས་པར་དཔྱད་ན། ཇོ་བོ་རྗེ་ཉིད་བསྟན་པ་ཡོངས་རྫོགས་ཀྱི་བདག་པོ་ཡིན་པ་དང་། ཇོ་བོ་རྗེས་འབྲོམ་རིན་པོ་ཆེ་ལ་བསྟན་པ་ཡོངས་རྫོགས་ཀྱི་མན་ངག་རྣམས་བུམ་པ་གང་བྱོའི་ཚུལ་དུ་གནང་བར་གོ་ནུས་ལ། དེ་ལྟར་གོ་ན་ཇོ་བོ་རྗེས་འབྲོམ་རིན་པོ་ཆེ་ལ་གནང་བ་ནས་བཟུང་། ཆོས་ཀྱི་རྒྱལ་པོ་ཙོང་ཁ་པ་ཡབ་སྲས་ལ་རིམ་གྱིས་བརྒྱུད་དེ། བསྟན་པ་ཡོངས་རྫོགས་ཀྱི་མན་ངག་རྒྱུན་མ་ཆད་པར་ཡོད་པ་འདི་ལ་ཡིད་ཆེས་ཀྱི་དད་པ་རྐང་ཚུགས་པ་སྐྱེའོ། །

འདི་དག་ལ་བློ་ཆུང་འགའ་ཞིག །འབྲོམ་རིན་པོ་ཆེས་ཇོ་བོ་ལ་སྐྱེས་བུ་གསུམ་གྱི་ལམ་རིམ་རྫོགས་པར་གསན་མོད་ཀྱང་། གསང་སྔགས་རྒྱུད་སྡེ་བཞིའི་མན་ངག་རྣམས་རྫོགས་པར་མ་གསན་ཏེ། ཇོ་བོ་རྗེས་དོ་ཧ་གསུང་བའི་ཚེ། འབྲོམ་རིན་པོ་ཆེས་ཨ་ཏི་ཤ་འདི་བོད་དུ་མི་ལེགས་ཞེས་བཀག་པས་སོ་སྙམ་པ་སྐྱེ་སྲིད་དེ། དེ་ནི་དེ་ལྟ་མ་ཡིན་ཏེ། འབྲོམ་རིན་པོ་ཆེ་ནི་ཐུགས་ནམ་མཁའ་ལྟར་རྒྱ་ཆེ་ཞིང་། རྒྱ་མཚོ་ལྟར་གཏིང་ཟབ་པས། སྤྱིར་གསང་སྔགས་གསང་ནས་བྱ་དགོས་པ་དང༌། ལྷག་པར་དོ་ཧ་སོགས་བླ་མེད་ཀྱི་རྫོགས་རིམ་མཐར་ཐུག་འདི་དག་ཤིན་ཏུ་གསང་བར་བྱ་དགོས་ཀྱི། དེ་ལྟར་མིན་པར་ཁྲོམ་བསྒྲགས་སུ་སོང་ན་འཆད་པ་པོ་རྣམས་ལ་རྩ་ལྟུང་འབྱུང་ཉེ་བ་དང༌། ཉན་པ་པོ་བསོད་ནམས་དམན་ཞིང་། བློ་གྲོས་ཆུང་བ་དག་ལ་ཕན་པ་ལས་གནོད་པ་ཆེ་བ་ཞིག་འབྱུང་སྟེ། གསང་སྔགས་སྒྲ་ཇི་བཞིན་པར་བཟུང་ནས། ནག་ཆང་ལ་བག་མེད་དུ་སྤྱོད་པ་སོགས་རང་ཉིད་ཕུང་བར་མ་ཟད། བསྟན་པ་རིན་པོ་ཆེ་རྨངས་ནས་འཇིག་པའི་རྐྱེན་དུ་འགྱུར་བར་གཟིགས་ནས། ཕྱི་ལྟར་དུ་དམ་དོག་ཆེ་བར་མཛད་པ་ཡིན་གྱི། གསང་བའི་གནས་སུ་ཇོ་བོ་རྗེས་འབྲོམ་རིན་པོ་ཆེ་ལ་རྒྱུད་སྡེ་བཞིའི་མན་ངག་ཡོངས་རྫོགས་གནང་ཞིང་། ཁྱད་པར་ཕ་རྒྱུད་གསང་བ་འདུས་པ་དང༌། མ་རྒྱུད་འཁོར་ལོ་སྡོམ་པའི་མན་ངག་མཐའ་དག་དང༌། བླ་མེད་སྤྱིའི་མན་ངག་མཐར་ཐུག་པ་གྲུབ་པ་སྡེ་བདུན་དང༌། སྙིང་པོ་སྐོར་གསུམ་གྱི་མན་ངག་རྣམས་བུམ་པ་གང་བྱོའི་ཚུལ་དུ་ཡོངས་སུ་རྫོགས་པར་གནང་ངོ༌། །

འབྲོམ་རིན་པོ་ཆེ་ནི། ཇོ་བོ་རྗེ་ལས་མན་ངག་ཡོངས་རྫོགས་གསན་པ་ཙམ་དུ་མ་ཟད། རང་ཉིད་དཀྱིལ་འཁོར་གྱི་བདག་པོར་ལྷུན་གྱིས་གྲུབ་པ་ཞིག་ཡིན་ཏེ། ཡེར་པ་ལྷ་རི་སྙིང་པོའི་མགུལ་དུ། ཇོ་བོ་ཡབ་སྲས་གཉིས་ལོ་གསུམ་གྱི་རིང་ལ་ལམ་གྱི་དཀའ་གནད་རྣམས་ལ་བགྲོ་བ་མཛད་པ་དེའི་ཚེ། རྗེ་བཙུན་འཇམ་པའི་དབྱངས་ཀྱི་སྲས་ཀྱི་ཐུ་བོ་རྔོག་ལེགས་པའི་ཤེས་རབ་ཀྱིས་ཞབས་འབྲིང་བ་གཅིག་མ་གཏོགས། རང་གི་གྲྭ་བུ་སློབ་སྦྱིན་བདག་དང་བཅས་པ་སུས་ཀྱང་མ་ཚོར་བར་གསང་སྟབས་ཀྱིས་ཡེར་པར་བྱོན་ནས། དངུལ་གྱི་མཎྜལ་ལ་དུང་གི་ཚོམ་བུ་བཀོད་དེ། འབྲོམ་ཆོས་ཀྱི་རྒྱལ་པོའི་སྐྱེས་རབས་སོགས་གསང་བ་ཟབ་མོ་རྣམས་གནང་དགོས་ཞེས་ཇོ་བོ་རྗེ་ལ་གསོལ་བ་བཏབ་པ་ན། ཇོ་བོ་རྗེས་ཀྱང་དེ་བཞིན་དུ་གནང་ནས། ད་ལམ་འབྲོམ་རིན་པོ་ཆེ་ཉིད་ལ་གསོལ་བ་གདབ་དགོས་ཞེས་འབྲོམ་ཉིད་ཀྱིས་གསུང་བར་བསྐུལ། རྗེ་བཙུན་མ་སྒྲོལ་མའང་དངོས་སུ་བྱོན། བརྒྱུད་པ་གསུམ་ལྡན་གྱི་བླ་མ་ཐམས་ཅད་ཀྱང་དངོས་སུ་ཕེབས། ནམ་མཁའི་ཁམས་སངས་རྒྱས་དང་བྱང་ཆུབ་སེམས་དཔས་གང་བ་རྣམས་ཀྱིས་ཀྱང་བྱིན་གྱིས་བརླབས་པ་ན། འབྲོམ་རིན་པོ་ཆེས་རང་ཉིད་སྤྱན་རས་གཟིགས་དངོས་ཡིན་པ་དང༌། སྔོན་གྱི་ཐུགས་བསྐྱེད་དང༌། སངས་རྒྱས་བྱང་སེམས་མང་པོས་ཀྱང་བསྐུལ་བ་ལ་བརྟེན་ནས། སྤྲུལ་པ་གྲངས་མེད་པས་བོད་ཡུལ་འདིར་སངས་རྒྱས་ཀྱི་བསྟན་པ་བཙུགས་པ་དང༌། ལྷག་པར་སྔོན་གྱི་ཆོས་རྒྱལ་ལོ་པཎ་བཀའ་དྲིན་ཅན་དེ་དག་ཇོ་བོ་ཡབ་སྲས་གཉིས་ཀྱི་སྤྲུལ་པ་ཡིན་ཚུལ་སོགས། སྐུ་གསུང་ཐུགས་ཀྱི་གསང་བ་མང་དུ་གསུངས་པའི་མཐར། སྐུ་ཐིག་ལེ་སེར་པོ་ཞིག་ཏུ་ཁྱིལ་ཁྱིལ་འདུག་པའི་འཕྲོ་ལ་སྐུ་མི་སྣང་བར་ཡལ།

དེར་དགེ་བཤེས་གསང་ཕུ་བ་དང༌། ནག་ཚོ་ལོ་ཙཱ་བ་དང༌། དགེ་བཤེས་ཀ་བ་གསུམ་འབྲོམ་རིན་པོ་ཆེའི་སྐུ་མ་མཐོང་བས། ཡིད་གདུང་ནས་མགྲིན་གཅིག་ཏུ། སྤྲུལ་པའི་ཆོས་རྒྱལ་གང་དུ་ཐལ། །རྒྱལ་བ་རྒྱ་མཚོ་གང་དུ་གཤེགས། །ཞེས་སོགས་གདུང་དབྱངས་ཀྱིས་གསོལ་འདེབས་ཤུགས་དྲག་མཛད་པ་ན། ཇོ་བོའི་ཞལ་ནས། རྒྱལ་བའི་འབྱུང་གནས་མཐོང་འདོད་ན། །ཁོ་ཡི་རང་བཞིན་སྙིང་རྗེ་ཡིན། །འགྲོ་བ་ཐམས་ཅད་ཡུལ་བྱས་ནས། །བཟོད་གླགས་མེད་པའི་སྙིང་རྗེ་སྒོམས། །རིང་པོར་མི་ཐོགས་མངོན་དུ་འགྱུར། །ཞེས་གསུངས་པ་ན་ཁོང་གསུམ་གྱིས་སྙིང་རྗེ་ཆེན་པོ་ཤུགས་དྲག་ཏུ་བསྒོམས་པས། ཇོ་བོའི་ཐུགས་ཀ་ཤེད་ནས་ཐིག་ལེ་དཀར་པོ་ཞིག་ཁྱིལ་ཁྱིལ་བྱེད་པ་སྙམ་བྱེད་པ་སྙམ་བྱུང་བ་ལ། ཐིག་ལེ་དེ་ལ་འོད་ཟེར་དཀར་པོ་དྲུག་བྱུང་བས་བཞི་ཕྱོགས་བཞིར་འཕྲོས། གཉིས་སྟེང་འོག་ཏུ་འཕྲོས། དེ་ནས་སླར་འཁོར་ཏེ་བྱུང་ནས། སྟེང་གི་འོད་བླ་གབ་ཀྱི་རྣམ་པ་ཁྱིལ་ལེ་བ་ཁང་པ་ཀ་བ་བཞི་ཙམ་རྒྱ་ཁེབས་པ་བཏུད་ནས་བལྟས་ན། ཨོཾ་གྱི་རྣམ་པར་གནས་པ་ཞིག་འདུག་གོ །དེ་བཞིན་དུ་འོག་གི་འོད་དེ་ཡང་དངུལ་དཀར་གྱི་མེ་ལོང་ལྟར་མཐོ་དམའ་མེད་པར་བླ་གབ་དང་རྒྱ་མཉམ་པར་གནས་ཏེ་བཏུད་དེ་བལྟས་ན་ཧཱུཾ་གི་རྣམ་པར་གནས་སོ། །དེ་བཞིན་དུ་ཤར་གྱི་འོད་དེ་ཡང་ལྷོ་བྱང་དུ་ངོས་ཕུན་སུམ་ཚོགས་པར་གནས་པ་བཏུད་དེ་བལྟས་ན་མའི་རྣམ་པར་གནས་སོ། །དེ་བཞིན་དུ་ནུབ་ཀྱི་འོད་དེ་ཡང་ལྷོ་བྱང་དུ་ངོས་ཕུན་སུམ་ཚོགས་པར་གནས་པ་བཏུད་དེ་བལྟས་ན་པད་ཀྱི་རྣམ་པར་གནས་སོ། །བྱང་གི་འོད་དེ་ཡང་དེ་བཞིན་དུ་ཤར་ནུབ་ཏུ་ངོས་ཕུན་སུམ་ཚོགས་པར་གནས་པ་བཏུད་དེ་བལྟས་ན་མེའི་རྣམ་པར་གནས་སོ། །ལྷོའི་འོད་དེ་ཡང་དེ་བཞིན་དུ་ཤར་ནུབ་ཏུ་ངོས་ཕུན་སུམ་ཚོགས་པར་གནས་པ་བཏུད་དེ་བལྟས་ན་ཎིའི་རྣམ་པར་གནས་ཏེ། མདོར་ན་འོད་དཀར་པོའི་གཞལ་ཡས་ཁང་གི་རྣམ་པ་ཕུན་སུམ་ཚོགས་པ་དགའ་བ་བདེ་བ་རྣམ་པར་རྟོག་པས་མ་བཅིངས་པ་དེ་ལྟ་བུའི་གཞལ་ཡས་ཁང་གི་སྟེང་འོག་དག་ངོས་གང་ནས་བྱུང་ཆ་མེད་པར་ཐིག་ལེ་དཀར་པོ་སྲན་མའི་གའུ་ཙམ་ཞིག་བྱུང་སྟེ། དེ་ལ་སེམས་བཏུད་དེ་བལྟས་པས། དེ་འགྱུར་བ་སྙམ་བྱེད་པ་ན་དེའི་གསེབ་ཤེད་ནས་ཧྲཱི་དཀར་པོ་བཀྲག་འཚེར་བ་ཞིག་བྱུང༌། དེ་ཡང་འོད་ཁ་དོག་རྣམ་པ་ལྔས་གཏུམ་ནས་འོད་ཀྱི་རྣམ་པར་ཧྲིལ་ཧྲིལ་ཡོང་བའི་གསེབ་ཤེད་ནས་རེས་འགའ་ཨའི་རྣམ་པ། རེས་འགའ་ཟླ་བའི་རྣམ་པ་འདྲ་བ་ཞིག་བྱུང་སྟེ་འོད་དེ་བཏེག་གོ །དེ་ནས་ཅུང་ཞིག་ནས་འོད་དེའི་གསེབ་ནས་ཚུར། ཨོཾ་མ་ཎི་པདྨེ་ཧཱུཾ། ཞེས་པའི་ཡིག་འབྲུ་དྲུག་རང་སྒྲ་དང་བཅས་སྟེང་འོག་ཕྱོགས་བཞི་དང་བཅས་པར་འོད་ཟེར་གྱི་རྣམ་པར་འཕྲོས་ཤིང་། སླར་ཡང་འོད་དེའི་དཀྱིལ་དུ་ཐིམ། དེ་ནས་རེ་ཞིག་ནས་འོད་དེ་ཇེ་སྲབ་ཏུ་སོང་ནས། འོད་ཅུང་ཟད་ཡོད་པའི་གསེབ་ཕར་ལ་བལྟས་པས། ད་ཅི་ནས་གནས་པའི་ཧྲཱི་དེ་ལ་ཡིག་འབྲུ་དྲུག་པོས་གཡས་ཕྱོགས་ནས་བསྐོར་ཏེ། དེ་དག་ལ་ཡང་དབུས་ཀྱི་ཡིག་འབྲུ་དེ་ལས་ཡིག་འབྲུ་དྲུག་པོ་དེ་དག་གི་རྣམ་པའི་འོད་ཟེར་འཕྲོས། དྲུག་པོ་དེ་ལས་ཀྱང་ཡིག་འབྲུ་རེ་རེ་ལའང་ཡིག་འབྲུ་དྲུག་དྲུག་གི་རྣམ་པའི་འོད་ཟེར་ཕྱོགས་བཅུར་འཕྲོས་ཏེ། མདོར་ན་འོད་ཟེར་དྲུག་ཅུ་དྲུག་ཅུ་བྱུང༌། དེར་འོད་ཐམས་ཅད་དང༌། ས་ཕྱོགས་ཐམས་ཅད་ཀྱང་ཡི་གེ་དྲུག་པ། ཨོ་མ་ཎི་པདྨེ་ཧཱུཾ་ཞེས་པའི་སྒྲ་འུར་འུར་བའི་སྣང་བ་བྱུང༌། དེ་ནས་འོད་ཟེར་དྲུག་ཅུ་དྲུག་ཅུ་པོ་དེ་དག་ཚུར་འདུས་ཏེ་ལ་ལ་སྟེང་། ལ་ལ་འོག་དང་ངོས་བཞི་ལ་ཐིམ། ལ་ལ་དབུས་ཀྱི་ཡིག་འབྲུ་ལ་བསྐོར་བའི་ཡིག་འབྲུ་དྲུག་ལ་ཐིམ། ལ་ལ་དབུས་ཀྱི་གཙོ་བོ་ཉིད་ལ་ཐིམ། དེ་ནས་རེ་ཞིག་ན་ཧྲཱི་དེ་ཉིད་བཤེས་གཉེན་པར་འགྱུར་བ་སྙམ་བྱེད་པའམ། ཡིག་འབྲུ་དྲུག་པོ་དེ་དག་གི་གསེབ་ནས་བྱུང་བ་སྙམ་བྱེད་པའམ། འོག་གཞི་ཟླ་བའི་དཀྱིལ་འཁོར་དེ་གཡོ་ཞིང་འདུག་པའི་གསེབ་ནས་བྱུང་བ་སྙམ་བྱེད་པའམ། རེས་འགའ་སྟེང་འོག་ངོས་བཞིའི་གསེབ་ནས་བྱུང་བ་སྙམ་བྱེད་དེ། མདོར་ན་དག་པའི་སྣང་བ་འཕགས་པའི་རྣམ་འཕྲུལ་གསལ་ལ་མི་རྟོག་པའི་འོད་ཀྱི་རྣམ་པར་བྱོན་ཏེ། ཧྲཱི་དེ་འགྱུར་བ་ལས་འོད་ཀྱི་གསེབ་ནས་འབྲོམ་རིན་པོ་ཆེ་བྱོན་པའི་ཞལ་ནས། ཆོས་ཐམས་ཅད་འདི་ལྟ་བུའི་རྣམ་པར་གདའ་གསུངས། དེ་ནས་དབུས་ཀྱི་ཡི་གེ་ལ་བསྐོར་བའི་ཡིག་འབྲུ་དྲུག་པོ་དེ་དབུས་ཀྱི་ཡིག་འབྲུ་ལ་ཐིམ། དབུས་ཀྱི་ཡིག་འབྲུ་དེ་ཡང་ཐིག་ལེ་གཅིག་ཏུ་ཁྱིལ། ཐིག་ལེ་དེ་ཡང་འོད་ཀྱི་རྣམ་པར་འོད་ཀྱི་གཞལ་ཡས་ཁང་ལ་ཐིམ། འོད་ཀྱི་གཞལ་ཡས་ཁང་དེ་ཡང་ཟླ་བའི་དཀྱིལ་འཁོར་ལ་ཐིམ། ཟླ་བ་དེ་ཡང་ཨ་འོད་ཀྱི་རྣམ་པ་ཅན་ཞིག་ཏུ་གྱུར། དེ་འབྲོམ་རིན་པོ་ཆེ་ལ་གཡས་ཕྱོགས་ནས་ཁྱིལ་ལེ་བསྐོར་ཞིང་བྱུང་བ། འབྲོམ་རིན་པོ་ཆེའི་ཞལ་ནས་ཨ་གསུངས་པས་ལྗགས་ཀྱི་སྟེང་ཁར་ཙེན་ཏེ་སོང་སྟེ་ཆོས་ཐམས་ཅད་སྐྱེ་བ་མེད་པའི་སྒོ་གསུངས་ཏེ། འབྲོམ་རིན་པོ་ཆེའི་སྐུ་རིལ་པོ་ཨའི་རྣམ་པར་ལམ་མེ་བྱུང༌། དེར་རྔོག་ལེགས་པའི་ཤེས་རབ་ལ་སོགས་པ་རྣམས་ཀྱིས་འབྲོམ་རིན་པོ་ཆེ་ལ་ནམ་བལྟས་བལྟས་ཀྱི་ཚེ་ཨ་རེ་ལམ་ལམ་བྱུང་ནས། ཆོས་ཐམས་ཅད་སྐྱེ་བ་མེད་པའི་རྣམ་པ་ལམ་པ་རེ་བྱུང༌། དེ་ནས་ཨའི་རྣམ་པ་དེ་མི་སྣང་བར་འབྲོམ་རིན་པོ་ཆེའི་སྐུ་འབའ་ཞིག་ཏུ་སྣང་ངོ༌། །

དེའི་ཚེ་འབྲོམ་རིན་པོ་ཆེའི་ཞལ་ནས། དེ་རིང་འུ་ཅག་དཔོན་སློབ་ཀྱི་རྣམ་འཕྲུལ་དེ་ཀུན་རྟོག་གེ་པ་ཀུན་འགལ་བར་བརྩི། འོ་ནའང་བརྩིར་ཆུག །ཆོས་ཀྱི་གནས་ལུགས་དེ་འདྲ་ཞིག་མིན་རི་ཞེས་རྒྱ་བོད་འགྲིམས་ནས་མནའ་སྐྱལ་ཡང་ཐོན་ནོ། །ཞེས་གསུངས་སོ། །ངེས་པ་དོན་དུ་དེ་ལྟར་ཡིན་མོད། ཐ་མལ་པའི་སྣང་ངོར་ཡང་ཇོ་བོ་རྗེས་འབྲོམ་རིན་པོ་ཆེ་ལ་མདོ་སྔགས་ཀྱི་མན་ངག་ཡོངས་སུ་རྫོགས་པ་གནང་ངོ་ཞེས་སྐྱེ་བོ་ཀུན་གྱིས་གོ་བའི་ཆེད་དུ་ཇོ་བོའི་ཞལ་ནས་ངས་ཁྱོད་ལ་འདི་མ་བཤད་དམ་གསུངས་ནས། ཆོས་རེ་རེ་ལ་ལན་རེ་རེ་བསྐྱར་ཞིང་གསུངས། དེ་ལྟར་ཐུགས་ལ་འདོགས་པས་ཇོ་བོའི་ཡོན་ཏན་སྣོད་གཅིག་ནས་ཐམས་ཅད་སྣོད་གཅིག་ཏུ་བྱོ་བ་ལྟ་བུ་འབྲོམ་རིན་པོ་ཆེ་ཡིན་གསུངས། འབྲོམ་རིན་པོ་ཆེས་ཇོ་བོའི་ཆོས་མང་དུ་མཁྱེན་ཅིང༌། ཁྱད་པར་སྐྱེས་བུ་གསུམ་གྱི་ལམ་གྱི་རིམ་པ་ལ་རྩལ་ཐོན། ཡི་དམ་གྱི་ལྷ་དཔག་ཏུ་མེད་པའི་ཞལ་གཟིགས། ཁྱད་པར་བླ་མ་ལ་གསོལ་བ་ཐེབས་པས། རྭ་སྒྲེང་དུ་བཞུགས་དུས་ཇོ་བོ་དངོས་སུ་བྱོན། སླར་ཡང་གསོལ་བ་བཏབ་པས་བཅོམ་ལྡན་འདས་ཤཱཀྱ་ཐུབ་པའི་ཞལ་མངོན་སུམ་དུ་གཟིགས་སོ། །

ཇོ་བོ་རྗེ་ཞིང་གཤེགས་སུ་ཉེ་བ་ན་ཡང་། འབྲོམ་རིན་པོ་ཆེ་ལ་ཇོ་བོ་རང་ཉིད་ཀྱི་འབྲལ་སྤང་ཨུ་རྒྱན་ནས་འོངས་པའི་རུས་རྒྱན་དང༌། འོད་མའི་ཚལ་གྱི་ཤིང་ལ་བསིལ་བའི་ཚལ་གྱི་མི་ལྤགས་ཀྱི་གཡོགས་ཅན་གྱི་ཌཱ་མ་རུ་དང༌། རིགས་ལྔའི་དབུ་རྒྱན་དང༌། རྡོ་རྗེ་དྲིལ་བུ་དང་བཅས་པ་སྨྱུག་དོང་མཐོ་གང་པ་གཅིག་ཏུ་ཤོང་བར་མཛད་དེ་ཕྱག་ཏུ་གཏད་པ་དང༌། ཇོ་བོའི་སློབ་མ་རྣམས་ཀྱིས་ཇོ་བོ་རྗེ་ཞིང་གཤེགས་ན་གདན་ས་སུས་འཛིན། རྒྱལ་ཚབ་སུས་བྱེད་ཅེས་ཞུས་པ་ན། ཇོ་བོ་རྗེས་ད་ཕྱིན་ཆད་ཐམས་ཅད་ཀྱིས་འབྲོམ་ལ་བརྟེན་གསུངས། དེ་ལ་དགེ་བཤེས་དགོན་པ་བས་དེ་གང་ཡིན་ཞེས་ཞུས་པས། ཁོ་ངས་བྱིན་གྱིས་བརླབས་པ་ཡིན་ཞེས་གསུངས་པ་སོགས་བཀའ་གདམས་གླེགས་བམ་ན། ཇོ་བོ་རྗེས་འབྲོམ་རིན་པོ་ཆེ་བསྟན་པའི་བདག་པོར་མངའ་གསོལ་བ་དང་། བརྒྱུད་པ་གསུམ་ལྡན་གྱི་བླ་མ་ཐམས་ཅད་དང་། རྗེ་བཙུན་མ་སྒྲོལ་མ་སོགས་ལྷག་པའི་ལྷ་རྣམས་དང༌། སྒྲོལ་མ་བཅུ་གཉིས་སོགས་མཁའ་འགྲོ་ཆོས་སྐྱོང་རྣམས་ཀྱིས་ཀྱང་འབྲོམ་རིན་པོ་ཆེ་ཇོ་བོའི་ཆོས་རྒྱུད་འཛིན་པའི་བདག་པོར་མངའ་གསོལ་བ་ལྟར་རོ། །

དེ་ནས་ཤིང་ཕོ་རྟའི་ལོ་དབྱུག་པ་ཟླ་བའི་ཚེས་བཅོ་བརྒྱད་ལ་ཇོ་བོ་རྗེ་སྐུ་གཤེགས་པ་ན། ཇོ་བོའི་སློབ་མ་རྣམས་འདུས་ཏེ་གསོལ་བ་འདེབས་པའི་ཚེ། འབྲོམ་རིན་པོ་ཆེས་ལྡེ་མིག་རྣམས་དགེ་བཤེས་ཀ་བའི་ཕྱག་ཏུ་ཕུལ། ཀ་བས་ཀྱང་འབྲོམ་རིན་པོ་ཆེ་ཇི་ལྟར་བཞེད་པ་བཞིན་དུ་མཛད་དེ། ཇོ་བོའི་གདུང་དང་རྒྱ་དཔེ། གསེར་གླིང་པའི་དངུལ་གདུགས་ཅན་ལ་སོགས་པ་རྟེན་གཙིགས་ཆེ་ཤོས་རྣམས་འབྲོམ་རིན་པོ་ཆེ་ལ་གཏད། བུ་ཆེན་གཞན་རྣམས་ལའང་རྟེན་སྐལ་རེ་མཛད།

དེ་ནས་ལུག་གི་ལོ་ལ་ཇོ་བོའི་འདས་མཆོད་ཆེན་མོ་མཛད། དེའི་ཚེ་དགེ་བཤེས་ཀ་བས་ཚོགས་སུ་གཏམ་བཏང་བ། གཞན་རྣམས་ཅི་ཙུག་བྱས་ཀྱང་། ང་ཕ་རྦ་རག་གི་བུ་ཚོ་རྣམས་ཀྱིས་འབུལ་བ་འདིར་ཞོག་ཅིག །ཇོ་བོའི་གདན་སར་ལྷ་ཁང་བྲེ་ཙམ་ཞིག་བཞེངས་དགོས་བྱས་པས། ཐམས་ཅད་ཀྱིས་འབུལ་བ་མ་ཁྱེར་བར་བཞག་སྟེ། འོར་གྱི་གཙུག་ལག་ཁང་བཞེངས། དེའི་དུས་སུ་འབྲོམ་རིན་པོ་ཆེའི་ཞལ་ནས། ད་ཇོ་བོའི་གདུང་འདི་རྣམས་དགེ་བསྙེན་དང་དགེ་ཚུལ་ལ་ཡང་མི་བསྐུར། ཁང་ནག་དུ་བ་ཅན་དུ་ཡང་མི་བཞུགས་གསུངས་ནས། དགེ་སློང་ཚུལ་ཁྲིམས་རྣམ་པར་དག་པ་གཉིས་སྤྱན་འདྲེན་དུ་བཅུག་སྟེ། སྟོད་ལུང་ཞོང་པའི་ན་ལ་སྦྲ་དཀར་ནག་གཉིས་ཕུབ་ནས་དཀར་པོའི་ནང་དུ་གདུང་བཞུགས་ཏེ་མཆོད་པ་མཛད། ནག་པོའི་ནང་དུ་གཡོས་མཛད། དེར་དགུང་གཅིག་བཞུགས། ས་ར་ལྷབ་ཀྱི་ན་ལ་དགུང་གཅིག །ཡས་ས་སྦུབ་ཀྱི་ན་ལ་དགུང་གཅིག །ལམ་པ་གསེར་ཕུག་གི་ན་ལ་དགུང་གཅིག །དེ་ནས་གནམ་གྱི་བྱེ་མ་ལུང་དུ་བྱོན།

དེ་ནས་འཕྲང་ཁ་བེར་ཆུང་གིས་ཞུ་བ་བསྐྱར་ནས་འབུལ་དུ་བཏང་བྱུང་བས། འབྲོམ་རིན་པོ་ཆེའི་ཞལ་ནས། འུ་ཅག་རྣམས་ལ་སྤྱན་འདྲེན་མཁན་གདའ་ན་འགྲོ་འམ་མི་འགྲོ་གསུངས་པས། དགོན་པ་བའི་ཞལ་ནས་ཁོང་གི་མི་སྐྱིན་ལ་འགྲོ་མི་དགོས་སམ་གསུངས། དེར་ཁོང་ཡུས་ཆེ་བས་འབྲོམ་རིན་པོ་ཆེས་ཞལ་གྱིས་བཞེས་ནས་སྔོན་ལ་ཡི་དམ་དངུལ་གདུགས་ཅན་བསྐུར། དེའི་རྗེས་ལ་རྭ་སྒྲེང་དུ་བྱོན་ཏེ། མེ་ཕོ་སྤྲེའུའི་ལོ་གསར་མཚམས་ལ་ཕྱགས་ཕེབས་ནས། རྭ་སྒྲེང་གི་དགོན་པ་གཟིགས་པས། རྒྱབ་ན་བྲག་རྡོ་རྗེ་འདྲ་བ་འདུག །མདུན་ན་མཚོ་གཡུང་དྲུང་འཁྱིལ་བ་འདྲ་བ་འདུག །གཡོན་གྱི་རི་རྒྱལ་སྲིད་རིན་པོ་ཆེ་སྣ་བདུན་འདྲ་བ་འདུག །ཕ་བོང་ཐང་འཁོར་ལོ་རྩིབས་བརྒྱད་འདྲ་བ་འདུག །ཤུག་པ་ར་ཙམ་ལུག་ཙམ་པ་ལ་གསེར་ལོ་གཡུ་ལོ་གཉིས་ལ་ཀ་བ་ཕེར་བ་འདུག །ཆུ་མིག་བརྒྱ་རྩ་བརྒྱད་འདུག །བྱ་རྣམ་པ་སྣ་ཚོགས་ཀུ་དི་རེ་བ་འདུག །མི་མ་ཡིན་རྗེས་པོ་ཆེ་བྱ་བ་དཀར་ཕྱོགས་ལ་དགའ་བ་དང༌། སྡོང་པོ་ཀུས་འདེབས་བྱ་བ་ནག་པོ་ལ་དགའ་བ་གཅིག་དང་གཉིས་འདུག །དགོན་པ་ལ་ཐུགས་མཉེས་ནས། དེའི་ནུབ་མོ་སེང་གེའི་བྲག་ཕུག་ཏུ་བཞུགས་ཏེ་རྨི་ལམ་བརྟགས་པས། དབུ་རྩེ་རྙིང་མའི་ཤུལ་ན་གསེར་གྱི་མཆོད་རྟེན་གཅིག་འདུག་པ་ལས་འོད་ཟེར་འཕྲོས་པས། དེའི་སྣེ་ལ་དབུ་རྩེ་གཎ་ཇི་ར་མང་པོ་བྱུང་ནས། བོད་ཀྱི་ཡུལ་ཐམས་ཅད་ཁྱབ་པར་བྱས། ཚུར་འདུས་པས་རྭ་སྒྲེང་གི་ཤུག་པའི་གསེབ་ཐམས་ཅད་དུ་དབུ་རྩེ་གཎ་ཇི་ར་བཙུགས་པས་གང་བ་ད་ལྟ་ཡོད་པ་བཞིན་རྨིས། གཞན་ཡང་ཕ་བོང་ཐང་གི་རྡོ་རིན་པོ་ཆེའི་ཕུང་པོར་སོང་བ་དང་། རྩེ་འཕྱིང་དཀར་མར་གྱི་ཕུང་པོར་སོང་བ་རྨིས། ནངས་པར་སུམ་པ་མཐུ་ཆེན་དང༌། རྣལ་འབྱོར་པ་ཆེན་པོ་དང༌། དགོན་པ་བ་གསུམ་བྱོན་ནས་རྟགས་བཟང་ངམ་ཞུས་པས། བཟང་བར་གདའ་གསུངས།

དེ་ནས་དགོན་པ་འདེབས་པར་ཐུགས་ཐག་བཅད་ནས། ས་འདུལ་ལ་བརྒྱད་སྟོང་འགྲེལ་ཆེན་གསུངས། ས་ཆོག་པཎྜི་ཏ་ཤྲཱི་སྠ་ར་ལ་ཞུས་པས་མ་གནང༌། དགོན་པ་བ་ལ་ཞུས་པས་ཀྱང་མ་གནང་བ་ལ། ད་གསང་ཕུ་བ་ལ་ཞུ་སྙམ་པ་ལ། རྣལ་འབྱོར་པའི་ཞལ་ནས། སྟོན་པ་ལ་མི་ཀུན་ཇོ་བོའི་ཡོན་ཏན་ཁྱེད་ལ་ཡོད་པར་བྱེད། ཁྱེད་འདི་འདྲ་བ་ཟེར་བས། འབྲོམ་གྱི་ཞལ་ནས། ངས་ཤེས་པ་ཡིན་ཏེ་གཅིག་ཏུ་རྟེན་དམན། གཉིས་སུ་ཁྱེད་གོང་མ་རྣམས་ཀྱིས་ཁྲེལ་གྱི་དོགས། གསུམ་དུ་མི་མ་ཡིན་ལ་འཚེར་བས་ལན། ད་འདི་བཞིན་དུ་བྱེད་པ་ཡིན་གསུངས་ནས། སྔོན་ལ་ཇོ་བོའི་སྐུ་འབག་དང་འཇམ་དཔལ་རྡོ་རྗེ་གཉིས་སྤྱན་དྲངས། གསོལ་བ་བཏབ་ནས་ཆུ་མིག་བསུབས། སྐྱེར་ཕུང་རྩ་བ་ནས་བཏོན་པ་ལ་སྦྲུལ་མྱོག་ཆེར་བྱུང་བས་ཇི་སྙམ་དུ་ཡང་མ་བསམས། དེ་ནས་ཁྲི་བརྩིགས། ཐིག་བཏབ། སྦྲ་ཕུབ་ནས་འདིར་ཇོ་བོའི་གདུང་བཞུགས་པས། ཁྱེད་རྣམས་ཀྱིས་ཀྱང་མཆིལ་སྣབས་ལ་སོགས་པ་མ་འདོར་ཞིག་གསུངས་སོ། །

དེའི་དུས་སུ་རྣལ་འབྱོར་པ་ཕྱག་ཁྲི་མཆོག་གིས་བལ་ཡུལ་དུ་དངུལ་འདོན་དུ་ཕྱིན་ནས། ཕྱིར་ཕེབས་པ་རྒྱ་གར་གྱི་ལྷ་བཟོ་མཁས་པ་ཨ་ཙ་ར་མ་ནུ་བྱ་བ་ལ་ཇོ་བོའི་གདུང་ཁང་དུ་དངུལ་གྱི་མཆོད་རྟེན་ནང་དཀྱིལ་འཁོར་གྱི་ལྷ་ཚོགས། ཕྱི་མཆོད་རྟེན་གྱི་རྣམ་པར་བཞེངས་སུ་གསོལ། ནང་རྫོངས་ཀྱི་གཟུངས་རྣམས་དངུལ་གྱི་ལྗང་པ་ལ་ཡི་གེ་བརྐོས་མ་བྲིས་ནས་བཞུགས། རི་རབ་ནི་ཐེག་པ་ཆེན་པོ་ཕ་རོལ་ཏུ་ཕྱིན་པའི་ལུགས་སུ་བགྱིས་ཏེ། མདུན་དུ་ཞལ་གཟིགས་པ་ཐུབ་པ་གཙོ་འཁོར་གསུམ། ནུབ་ཏུ་ཞལ་གཟིགས་པ་དམ་ཚིག་གསུམ་བཀོད་པ་གཙོ་འཁོར་གསུམ། བྱང་དུ་ཞལ་གཟིགས་པ་བྱམས་པ་མངོན་པར་བྱང་ཆུབ་པ་གཙོ་འཁོར་གསུམ། ཤར་དུ་ཞལ་གཟིགས་པ་སྨན་བླ་གཙོ་འཁོར་གསུམ། བུམ་པ་ནི་ཐེག་པ་ཆེན་པོ་གསང་སྔགས་ཀྱི་ལུགས་སུ་བགྱིས་ཏེ། དཔལ་གསང་བ་འདུས་པ་ལྷ་བཅུ་དགུ་ཕྱི་ནང་དུ་འབུར་དུ་དོད་པ་ལ་ཕྱོགས་བཞི་ན་ཡབ་བཞི། མཚམས་བཞི་ན་ཡུམ་བཞི། གཙོ་བོ་འཇམ་དཔལ་རྡོ་རྗེ་བྲེའི་མགུལ་ན་བཞུགས། ལྷ་མོ་དྲུག་ནང་དུ་འབུར་དོད་དུ་བཞུགས། ཁྲོ་བོ་བཞི་ནས་ཙམ་རེ་ཟུར་གྱི་མཆོད་རྟེན་གྱི་ནང་ན་བཞུགས་པ་གཅིག་བཞེངས་སུ་གསོལ་ཏེ། འབྲོམ་རིན་པོ་ཆེས་རྣལ་འབྱོར་པ་རྣམས་དང་བཀའ་བགྲོས་མཛད་ནས། བྱ་ལོ་ལ་གདུང་ཁང་དང་གཙུག་ལག་ཁང་ཁྱུང་མགོ་ཅན་གྱི་རྔ་ཁང་ཡན་ཆོད་ཚར་བར་མཛད་ནས། ད་འདི་མན་ཆད་ལ་བྱེད་པ་པོ་ཞིག་འོག་གི་གསུངས་ཏེ། འཛིན་རྡོ་ཡོན་ཏན་འབར་བྱ་བ་ལ་བོད་པ་མཛད་ནས། ཁྱོད་འཇིག་རྟེན་གྱི་ཤེས་ཆེ་བ་ཡིན་པས་ཤེས་གྱིས་དང་། ཁོ་བོས་འཇིག་རྟེན་གྱི་རྣམ་པར་རྟོག་པ་སྤོང་བློ་ཞིག་བགྱི་གསུངས་ནས། ཁྱུང་མགོ་ཅན་ལ་བསྐོར་བ་མཛད་དེ་ཤངས་སྣབས་ཀྱིས་ཀྱང་ལྐོག་མ་ན་མར་སླེབ་པར་བྱས་ནས། འཇིག་རྟེན་མཁྱེན་པ་རྙེད་དང་མ་རྙེད་དང༌། །ཞེས་བྱ་བའི་ཚིགས་བཅད་དེ་འདོན་ཞིང་། ཆོས་བརྒྱད་པོ་དེ་ལ་བཏང་སྙོམས་སུ་མཛད་ཅིང་བཞུགས་པ་ལགས།

དེ་ལྟར་འབྲོམ་སྟོན་པ་རྒྱལ་བའི་འབྱུང་གནས་ཐུགས་ཟབ་ལ་དཀྱེལ་ཆེ་བ། མཁྱེན་པའི་ཚད་རྒྱ་མཚོ་ཆེན་པོ་དང་མཚུངས་པ་དེས་རྭ་སྒྲེང་དུ་ཇོ་བོའི་སྲོལ་བཟང་གིས་བཙུགས་ནས་ཡོད་པའི་དུས་སུ། ཐུགས་ཀྱི་སྲས་སྐུ་མཆེད་གསུམ་རིམ་པར་བྱོན་པ་ཡིན་ཏེ། བུ་ཆུང་བས་ནི་སྙེ་ཐང་ཉིད་ནས་ཕྱགས་ཕྱི་མཛད། སྤྱན་སྔས་མེ་མོ་བྱའི་ལོ་ལ་རྭ་སྒྲེང་དུ་བྱོན། པོ་ཏོ་བས་དེའི་ཕྱི་ལོ་ལ་རྭ་སྒྲེང་དུ་བྱོན། དེ་ལྟར་ཞབས་དྲུང་དུ་བསྙེན་པའི་སློབ་མ་རྣམས་འཇིག་རྟེན་ལ་ཞེན་པ་བཟློག་ཏུ་བཅུག་ནས། ཆོས་ཁོ་ན་སེམས་སུ་བཅུག་པ་ལ་འབྲོམ་རིན་པོ་ཆེའི་དུས་ན་དགེ་འདུན་ལྔ་བཅུ་ཙམ་ལས་མེད་དེ། དེ་རྣམས་ཀྱི་དབང་དུ་བྱས་ན། ཏིང་ངེ་འཛིན་བཟང་པོ་ཐུགས་རྒྱུད་ལ་འཁྲུངས་ཤིང་། ཚུལ་ཁྲིམས་རྣམ་པར་དག་པ། ཡི་དམ་གྱི་ལྷའི་ཞལ་གཟིགས་པ། མངོན་པར་ཤེས་པ་རྒྱ་ཆེན་པོ་དང་ལྡན་པ། ཆོས་རྣམས་ཀྱི་རང་དང་སྤྱིའི་མཚན་ཉིད་རིག་པའི་ཤེས་རབ་ཕུན་སུམ་ཚོགས་པ་མངའ་བ། ནུབ་ཕྱོགས་ཨོ་རྒྱན་དང་འདྲ་བ་གྲུབ་ཐོབ་དུ་སྤུང་ངེ་བ་གཅིག་བྱོན་ཏེ། མཚོ་ལ་པདྨས་བརྒྱན་པ་འདྲ་བའི་འཁོར་སྐད་པ་དེ་དགེ་བཤེས་སྟོན་པའི་འཁོར་དེ་ཀུན་ལ་ཟེར་བ་ཡིན། དེ་བས་ན་མང་ཁ་ན་མེད་གྲུང་གཙོ་བ་ཡིན་གསུངས།

དགེ་བཤེས་པོ་ཏོ་བས་ཀྱང༌། ངའི་དོན་གྱི་མཁན་པོ་དེ་རྭ་སྒྲེང་གི་དགེ་བསྙེན་རྒན་པོ་དེར་སྣང་གསུངས་ནས། འབྲོམ་རིན་པོ་ཆེའི་གདམས་པ་ཐུགས་ཉམས་སུ་བཞེས་པས། ངེས་འབྱུང་གི་བསམ་པ་མ་བཅོས་པ་ཐུགས་ལ་འཁྲུངས་པ་ན། སྔར་གྱི་སོ་སོ་ཐར་པའི་སྡོམ་པ་ངེས་འབྱུང་གི་སྡོམ་པར་སོང་གསུངས་པ་ལགས།

དེ་ལ་སྤྱིར་ཇོ་བོ་བོད་དུ་ཕེབས་ནས་བདག་གཉེར་འབྲོམ་རིན་པོ་ཆེས་མཛད། ཇོ་བོ་རྗེ་ཉིད་ཀྱང་འབྲོམ་རིན་པོ་ཆེ་ཁོ་ན་ལ་ཐུགས་གཏོད་པར་མཛད། བསམ་ཡས་སུ་བཞུགས་པའི་ཚེ། ཇོ་བོ་རྗེས་འབྲོམ་རིན་པོ་ཆེ་ལ་གསང་སྔགས་ཀྱི་སྤྱོད་པའི་ཐབས་མང་པོ་དང༌། མཆིམས་ཕུར་དོ་ཧ་ལ་སོགས་པའི་གདམས་པ་ཟབ་མོ་རྣམས་གནང་ཞིང་། ནང་དུ་ཐུགས་ཉམས་སུ་བཞེས་པར་མཛད་ཀྱང་། གསང་སྔགས་སྒྲ་ཇི་བཞིན་པར་སྤྱོད་པའི་རྩིང་སྤྱོད་རྣམས་ཇོ་བོའི་དྲིན་ལས་མེད་པ་ཞིག་བྱུང་ན་དགོངས་བས། གསང་སྔགས་ཟབ་མོ་རྣམས་གསན་པ་སྐད་དུ་ཡེ་མི་མཛད་པར། ཐེག་པ་ཆེན་པོའི་བླ་མ་བྱ་བ་བཤད་པ་ན་འབྱམས་ཀླས་པར་གོ་བ་བསྐྱེད་ལ། ལག་ཏུ་ལེན་པ་ན་བསྟན་པའི་ཐ་མ་ལ་གང་ཕན་དང༌། ཐད་ཀར་དོན་དུ་གང་འགྱུར་སྟོན་པ་ཞིག་དགོས་གསུངས་ཤིང་། འབྲོམ་རིན་པོ་ཆེ་ཉིད་ཀྱང་དེ་ལྟར་དུ་འདོམས་པར་མཛད།

འབྲོམ་རིན་པོ་ཆེས་ཞང་ཆོས་ཀྱི་རྒྱལ་པོ། ཇོ་བོ་ལེགས། ཡོངས་རྫོགས་རྣལ་འབྱོར་པ། སྤྱན་སྔ་དང་བཞི་མིན་པ་ལ་སྔགས་ཀྱི་དབང་བསྐུར་མ་གནང་བ་ཡིན་གསུངས། པོ་ཏོ་བས་འབྲོམ་རིན་པོ་ཆེའི་སྤྱན་སྔར་ལོ་ངོ་བདུན་བཞུགས་པ་ལ་བུམ་པ་འཆའ་བ་ལན་ཅིག་ལས་མ་གཟིགས་གསུངས། སྔོན་རྣལ་འབྱོར་པ་ཆེན་པོས་འབྲོམ་རིན་པོ་ཆེ་ལ་བསྲུང་སྡོམ་རྣམ་པར་དག་པའི་སྟངས་ཕུལ། ཏིང་ངེ་འཛིན་ཕུན་སུམ་ཚོགས་པའི་རྟོགས་པ་ཕུལ་བས། འབྲོམ་རིན་པོ་ཆེའི་ཞལ་ནས། ཁྱོད་བསྲུང་སྡོམ་རྣམ་པར་དག་སྟེ་བསྡམ་པར་བྱ་བའི་ཉེས་བྱས་ཕྲ་མོས་ཀྱང་མ་གོས། ཏིང་ངེ་འཛིན་བཟུང་སྟེ་རྣ་རྩར་རྔ་བོ་ཆེ་བརྡུངས་ཀྱང་མི་ཚོར་བ་ཡོད་ཀྱང་། དེ་བས་ངའི་བྱམས་པ་སྙིང་རྗེ་བྱང་ཆུབ་ཀྱི་སེམས་མེད་ན་ཉིན་མཚན་དུ་བཤགས་པ་བྱ་དགོས་པའི་སར་སྐྱེས་དོགས་ཡོད་དོ་གསུངས་སོ། །

ཡང་ལན་ཅིག་མུ་གེ་ཞིག་བྱུང་བའི་དུས་སུ། འབྲོམ་ཟ་ལོ་མཚོ་མ་བྱ་བ་ཞིག་གིས་ནས་མི་ཁུར་ལྔ་བཅུ་ཕུལ་ནས། དེའི་མིང་པོ་འབྲོམ་ཚིག་པ་ད་རེ་བྱ་བས་གཏམ་བཏང་བ། ཇོ་བོ་ལྷ་ཅིག་འཛམ་བུ་གླིང་གི་རྒྱན་དམ་པ་ཡིན། དེའི་མན་ངག་བུམ་པ་གང་བྱོའི་ཚུལ་དུ་མངའ་བ་དགེ་བའི་བཤེས་གཉེན་སྟོན་པ་ཁྱེད་ཡིན། ཕྱོགས་ཕྱོགས་ནས་བྱོན་པའི་གྲྭ་པ་ཀུན་ཡང་མན་ངག་འདོད་པ་ཡིན་པས། དེ་རིང་ཇོ་བོའི་མན་ངག་གསུངས་པར་ཞུ་ཞུས་པས། འབྲོམ་རིན་པོ་ཆེའི་ཞལ་ནས་བྱ་བྱ་གསུངས་ནས། འཆི་བ་མི་རྟག་པ་དང་ལས་དང་འབྲས་བུ་མང་དུ་བསམས་ལ། ཁས་བླངས་པའི་སྡོམ་པ་དག་པར་བྱ། བྱམས་པ་དང་སྙིང་རྗེ་མང་དུ་སྒོམས་ལ། བྱང་ཆུབ་ཀྱི་སེམས་བརྟན་པར་བྱ། དེས་འཕངས་ནས་ཚོགས་སྒོ་སྣ་ཚོགས་ནས་གསོག་ཅིང་། སྡིག་པ་སྒོ་སྣ་ཚོགས་ནས་སྦྱོང་བ་དེ་བླ་མའི་མན་ངག་ཡིན་པས། སང་ཙ་ན་ཇོ་བོ་རྗེ་ལྷ་ཅིག་དང་མ་ཕྲད་སྙམ་ནའང་དེ་ལས་མེད་དོ། །འབྲོམ་དགེ་བསྙེན་རྒན་པོ་དེ་དང་མ་ཕྲད་སྙམ་ནའང་དེ་ལས་མེད་གསུངས།

ཡང་འབྲོམ་རིན་པོ་ཆེའི་ཞལ་ནས། ངའི་ལམ་གྱི་རིམ་པ་འདི་ལ་སུ་ཡིད་ཆེས། ཁམས་མ་གི་ན་སྟོང་ཟོམ་ཡོན་ཏན་སྙིང་པོ་བྱ་བ་ཞིག་ཡོད་དེ། དེ་ལ་བཟླས་ན་ཡིད་ཆེས་སམ་གསུངས། འབྲོམ་རིན་པོ་ཆེས་དགོན་པ་ལ་ཉིན་གཅིག་ཐུགས་དམ་སྐྱེལ་དུ་བྱོན་ཙ་ན། མཎྜལ་རྡུལ་ཆིང་ངེ་འདུག་པ་ལ། སྒོམ་པ་དབང་ཕྱུག་རྒྱལ་མཚན། མཆོད་པ་མི་བརྗེ་བ་ཅུག་ཡིན་གསུངས་པས། བག་རེ་ནང་དུ་བསམ་འཚལ་བར་གདའ་བས་ཞུས་པས། ཁྱོད་གཅིག་པུ་ལ་སྒོམ་ཡོད་སྙམ་མམ། ཁྱོད་བས་ཨ་ཏི་ཤ་སྒོམ་བཟང་སྟེའང་། མཆོད་པ་འདི་དང་འདི་རྣམས་མཛད་པ་ཡིན། ང་ལ་ཡིད་མ་ཆེས་ན་མདོ་སྡེ་ལྟོས་གསུངས།

ཡང་འབྲོམ་རིན་པོ་ཆེ་སྐུ་ཁམས་ཅུང་མ་བདེ་བ་ཞིག་གི་དུས་སུ། རྣལ་འབྱོར་པ་ཆེན་པོས་རྩིག་པ་ལ་ཐག་ཐོགས་མེད་པར་བྱོན་ཏེ་བསྙུན་དྲིས་པས། ཇོ་བོ་བ། ཁྱོད་གང་ངོ་ཚ་བའི་ཡན་ལག་དེས་དྲེགས་སམ། སེམས་ཅན་བཞག་ནས་གར་ཆ། དེ་ནི་ཉིན་མཚན་དུ་བཤགས་པ་བྱ་དགོས་པའི་སར་སྐྱེ་བ་ཡིན་གསུངས་ནས་བཀའ་བཀྱོན།

ཡང་དགོན་པ་གོང་ན་འབྲོམ་རིན་པོ་ཆེ་དང༌། རྣལ་འབྱོར་བ་རྣམ་པ་དང༌། སྐུ་མཆེད་གསུམ་རྣམས་འཚོགས་ནས་ཀུ་རེ་བཞད་གད་ཙིག་སེ་མཛད་ཙ་ན། ཉེ་གནས་ན་རེ། ཀུ་རེ་ནི་ཀུ་རེ་སྟེ་འུ་ཅག་རྣམས་དེ་རིང་ཅི་ཟ་ཟེར་བ་ལ། དགོན་པ་བའི་ཞལ་ནས། ཨ་པོ་ནི་སྤུས་སྣ་གདོང་ན་ཡར་བྱུང་བ་འོ་ནི་ཀུན་ཟ་བ་ཡིན་གསུངས། དར་གཅིག་ལོན་ཙ་ན་ཡོན་བདག་གཅིག་གིས་ཕྱེ་དང་མར་ཐུད་འཁུར་བ་ཞོ་ལ་སོགས་པ་རྟ་རྒྱབ་གཅིག་བཀལ་ནས་བྱུང་བས་བསྙེན་བཀུར་བཟང་པོ་བྱས། དེར་འབྲོམ་རིན་པོ་ཆེས་བསྔོ་བ་ཡོན་བཤད་མཛད་ནས་ཡོན་བདག་དེ་སོང་བའི་ཤུལ་དུ་བཀའ་ཕབ་མཛད་དེ། སྒོམ་ཆེན་པ་ཀུན་ཀྱང་ཡོན་ཏན་བག་རེས་སྦོས་ནས། ཕྱིན་ཆད་དེ་འདྲ་བ་གསུང་རྒྱུ་མ་ལགས་གསུངས་ནས་བཀྱོན་པར་མཛད།

འབྲོམ་རིན་པོ་ཆེ་བརྒྱད་སྟོང་འགྲེལ་ཆེན་གསུངས་པའི་དུས་སུ། མཁྱེན་གསུམ་ཐོན་ནས་རྣམ་ཀུན་ལ་མ་ཟུག་པའི་སྐབས་སུ་སྐུ་ཁམས་ལྟེམ་པ་ཞིག་བྱུང་ནས། འགྲེལ་པ་གསུང་མ་སྤྱོད་པར་འདི་མན་ཆོད་ཀྱི་དོད་པོ་གཅིག་བྱ་གསུངས་ནས། ཕ་རོལ་ཏུ་ཕྱིན་པ་དྲུག་གསུམ་བཅོ་བརྒྱད་དུ་ཕྱེ་བའི་ཉམས་སུ་བླང་བདེ་བ་ཞིག་གསུངས་པས། སྤྱན་སྔའི་ཞལ་ནས། གསུང་མ་སྤྱོད་པ་རང་གིས་འཚེངས་བསམ་པ་ཞིག་གསུངས་པས། དེ་ལྟར་ན་འབྲོམ་རིན་པོ་ཆེ་དེས་གཡུང་ཆོས་མགོན་ལོ་བཞིར་བསྟེན། རྒྱལ་གྱི་ཞང་ལ་དགེ་བསྙེན་གྱི་སྡོམ་པ་མནོས་ནས་ཁམས་སུ་ཇོ་བོ་སེ་བཙུན་གྱི་ཞབས་དྲུང་དུ་ལོ་ཉི་ཤུ། དེ་ནས་ཇོ་བོ་དང་མཇལ་ནས་ཇོ་བོ་ཞིང་མ་གཤེགས་ཀྱི་བར་དུ་མི་འབྲལ་བར་ཞབས་ཏོག་མཛད། ཇོ་བོའི་ཡོན་ཏན་མ་ལུས་པ་ཐུགས་སུ་ཆུད་པར་མཛད་ནས། རྭ་སྒྲེང་དུ་ལོ་དགུར་བསྟན་པའི་མངའ་བདག་མཛད་དེ། སྤྱིར་སངས་རྒྱས་ཀྱི་བསྟན་པ་རིན་པོ་ཆེ་ཡང་སྒོས་སུ་བཀའ་གདམས་ཀྱི་བསྟན་པ་རིན་པོ་ཆེ་ཉི་མ་ཤར་བ་ལྟ་བུར་མཛད།

ཕྱི་རབས་ཀྱི་གདུལ་བྱ་རྣམས་ཀྱི་དོན་དུ་ཇོ་བོ་རྗེ་དང་། འབྲོམ་རིན་པོ་ཆེ་རང་ཉིད་ཀྱི་ཐབས་མཁས་ཀྱི་སྤྲུལ་པ་འབྱོན་ཚུལ་གསང་བ་ཟབ་མོའི་གནས་རྣམས་ཀྱང་སྟོན་པར་མཛད་དེ། རྗེ་བཙུན་འཇམ་པའི་དབྱངས་ཀྱི་སྤྲུལ་པ་རྔོག་ལེགས་པའི་ཤེས་རབ་ཀྱིས་གསོལ་བ་ཤུགས་དྲག་ཏུ་བཏབ། ཇོ་བོ་རྗེས་ཀྱང་གསུང་བར་བསྐུལ་ནས། འབྲོམ་རིན་པོ་ཆེས་ཕྱོགས་བཅུའི་སངས་རྒྱས་ཐམས་ཅད་ཀྱིས་འཕགས་པ་སྤྱན་རས་གཟིགས་ཀྱི་ཐུགས་རྗེ་བསྐུལ་ནས། བོད་ཁ་བ་ཅན་གྱི་མགོན་པོར་བྱོན་པའི་ལོ་རྒྱུས་རྣམ་ཐར་ཞིབ་ཏུ་གསུངས་ཤིང༌། མ་འོངས་པ་ནའང་ཇོ་བོ་རྗེ་དང་འབྲོམ་རིན་པོ་ཆེ་གཉིས་ཀྱི་སྤྲུལ་པ་རྒྱུན་མི་འཆད་པ་བྱོན་ནས། རྒྱལ་བསྟན་འཛིན་ཅིང་སྤེལ་བ་དང༌། དེ་དང་དེའི་ཚེ་དགོན་གནས་ཇི་ལྟ་བུ་འབྱུང་བ་དང༌། མཚན་ཇི་ལྟ་བུ་འབྱུང་དང༌། མཛད་པ་ཇི་ལྟ་བུ། མཛད་རྣམས་ལུང་བསྟན་པའི་གླེགས་བམ་མཛད། བཀའ་གདམས་བསྟན་པའི་ཆུ་འགོ་བཙུགས། བཀའ་གདམས་ཀྱི་བསྟན་པའི་སྙིང་པོའི་ཡང་སྙིང་པོ་ཐིག་ལེ་བཅུ་དྲུག་གི་གདམས་ངག་ཆ་ལག་དང་བཅས་པ་ཐོར་བུར་བསྟན་པ་དང༌། ཁྱད་པར་རྒྱལ་བའི་བཀའ་དང་དགོངས་འགྲེལ་མ་ལུས་གང་ཟག་གཅིག་གི་ཉམས་ལེན་གྱི་རིམ་པར་ཧྲིལ་གྱིས་དྲིལ་བ། སྐྱེས་བུ་གསུམ་གྱི་ལམ་གྱི་རིམ་པ་རྒྱ྄ུད་ལ་སྦྱོར་ཚུལ་ཤིན་ཏུ་གསལ་ཞིང་གོ་བདེ་བ། བློ་མཐོ་དམའ་སུས་བལྟས་ཀྱང་རྒྱུད་འཁུལ་བ་རང་རྒྱུད་ལ་བསྐུལ་འདེབས་དད་པའི་ལྗོན་ཤིང་སོགས། གདམས་ངག་གི་ཡིག་འཇོག་ཀྱང་མང་དུ་མཛད་ནས། མྱ་ངན་ལས་འདའ་ཁར། པོ་ཏོ་བའི་པང་དུ་དབུ་བཞག་ནས་ཡོད་པའི་ཚེ། པོ་ཏོ་བའི་ཐུགས་ལ་འཇིགས་སར་སྐྱེལ་མས་བོར་བ་འདྲ་བ་ཞིག་འོང་བར་འདུག་ན། ད་སུ་ལ་བརྟེན་སྙམ་ཞིང་སྤྱན་ཆབ་འབྲོམ་རིན་པོ་ཆེའི་ན་བཟའི་གོང་ཙ་ན་མར་ཉིལ་གྱིས་བྱུང་བས། འབྲོམ་རིན་པོ་ཆེས་མཁྱེན་ནས། ཞལ་ཆེམས་ལ་ད་ཕན་ཆད་དགེ་བའི་བཤེས་གཉེན་འདི་ཁོ་ན་ལ་བརྟེན་དགོས་བྱ་བ་ཡེ་མེད་ཀྱི། མདོ་སྡེ་ལྟོས། དགེ་བའི་བཤེས་གཉེན་མདོ་སྡེ་ལ་གྱིས། གྲོགས་པོ་མིག་ཟུར་ལ་ལྕི་བ་དང་འགྲོགས། ཁ་མཉམ་ལག་མཉམ་དེས་ཀྱང་མི་འོང་བར་སྣང༌། གཉིས་དང་གསུམ་ཡང་ཉུང༌། གཅིག་པུར་ཡེ་མ་འདུག །བཞི་ལྔ་མན་ཆོད་ཙམ་རན། དེ་ལས་མང་དུ་ཡང་མི་རུང༌། སེམས་བཟང་པོར་གྱིས་དང༌། ཁྱད་པར་ཅན་དང་ཕྲད་དེ་འོང་གི་གསུངས་ནས། མདུན་ན་ཇོ་བོ་ལེགས་ཡོད་པས། སེམས་བཟང་པོ་བྱང་ཆུབ་ཀྱི་སེམས་ཟེར་བ་མ་ལགས་སམ་ཞུས་པས། ཡིན་མོད་གསུངས་ནས། སྐུ་དངོས་ཀྱི་གདུལ་བྱ་རྣམས་རྫོགས་པ་ན། ཤིང་ཕོ་འབྲུག་གི་ལོ་སྣྲོན་གྱི་ཟླ་བའི་ཚེས་ཉི་ཤུ་ལ་རྭ་སྒྲེང་དུ་སྐུའི་བཀོད་པ་བསྡུས་ཏེ། དགའ་ལྡན་ཆོས་ཀྱི་ཕོ་བྲང་དུ་རྒྱལ་བ་མ་ཕམ་པ་དང་། ནམ་མཁའ་དྲི་མ་མེད་པ་འཁོར་བཅས་ཀྱི་ཞབས་དྲུང་དུ་ཕེབས་ཤིང༌། གཞན་ཡང་ནམ་མཁས་གར་ཁྱབ་ཏུ་སྤྲུལ་པའི་བཀོད་པས་ཁྱབ་སྟེ། གདུལ་བྱ་གང་དང་གང་ན་ཡོད་པ་དེར་རང་རང་གི་ཁམས་དང་། བསམ་པ་དང་མཐུན་པར་སྐུའི་བཀོད་པ་བསྟན་ནས། འགྲོ་བའི་དོན་མཛད་ཅིང་བཞུགས་སོ། །

འབྲོམ་རིན་པོ་ཆེ་འདི་ལ་ལྷ་དང་མིའི་སློབ་མ་བསམ་གྱིས་མི་ཁྱབ་པ་ཡོད་ཅིང༌། བསྟན་པ་ཡོངས་རྫོགས་འཛིན་པའི་སློབ་མའང་ཆེས་མང་བར་ཡོད་ལ། ཡོངས་སུ་གྲགས་པའི་སློབ་མའི་གཙོ་བོ་ནི་དགེ་བཤེས་ཁམས་པ་ལུང་པ་ཆེན་པོ་དང༌། རྣལ་འབྱོར་རྣམ་པ་བཞི་དང་བཀའ་གདམས་སྐུ་མཆེད་གསུམ་སྟེ།

ཁམས་པ་ལུང་པ་ཆེན་པོ་ནི། འཕན་ཡུལ་ཡུང་བར་ཤིང་མོ་གླང་ལ་འཁྲུངས། རུས་སྒང༌། རྟེན་དགེ་བསྙེན་ཡིན། མཚན་ཤཱཀྱ་ཡོན་ཏན། གཞོན་པའི་དུས་སྡེ་སྣོད་ལ་ཡང་སྦྱངས་པ་མཛད་དེ། ཉིད་ཀྱི་ཞལ་ནས། ངས་ལྷ་ས་སྙེ་ཐང་དུ་བ་མ་ཡིན་པ་དང་རྟ་མ་ཡིན་པ་ལ་མི་ཚེ་བསྐྱལ་ཞེས་གྲགས། སྙེ་ཐང་དུ་ཇོ་བོ་ཉིད་དང་མཇལ་ཞིང་། ཕྱིས་རྭ་སྒྲེང་དུ་དགེ་བཤེས་སྟོན་པ་ཡུན་རིང་བསྟེན་ཅིང་། སྐུ་མཆེད་གསུམ་མམ་བཞི་ཞེས་གྲགས། པོ་ཏོ་བའི་ཞལ་ནས། ཡུང་བའི་དགེ་བཤེས་སྒང་ཤཱཀྱ་ཡོན་ཏན་གྱིས་ཆོས་བདེན་པར་བཟུང་ནས་སྐྱབས་སུ་མཆི་བྱས་པས། ད་ལྟ་ཡུང་བ་ལུང་པ་ན་ཁོང་ལས་བདེ་སྐྱིད་ཆེ་བ་མེད་གསུངས། དེ་ལྟར་དགེ་བཤེས་ཁམས་ལུང་པས་དགུང་ལོ་དགུ་བཅུའི་བར་བསྒྲུབ་པའི་རྒྱལ་མཚན་བཙུགས་ཤིང་། སེམས་ཅན་གྱི་དོན་མཛད་ནས། ཤིང་མོ་ལུག་དགུ་བཅུ་རྩ་གཅིག་པ་རྟའི་ཟླ་བའི་ཚེས་བཅུ་བཞི་ལ་ཁམས་ལུང་དུ་སྐུ་གཤེགས། ཆོས་ལ་ཐུན་བརྒྱད་མར་མིང་ཐོགས་ཚོགས་པ་སྟོང་ཕྲག་རེ་ཙམ་འཚོགས། བྱང་ཆུབ་ཀྱི་ཐུགས་འབྱོངས་པས། ཞལ་མཐོང་བ་ཐམས་ཅད་དད་པར་གྱུར། ཕྱོགས་མཐའ་དག་ནས་མཇལ་མི་བྱུང་བ་ན། ཁྱེད་ཅག་གི་ཡུལ་ན་མི་རྒན་མེད་དམ་གསུངས་པ་ལ། མི་རྒན་ཏ་ཡོད་དེ་ཁྱེད་ལྟ་བུ་མེད་ཅེས་ཞུས། མདོར་ན་མཐོང་ཐོས་དྲན་རེག་དོན་ལྡན་དུ་འགྱུར་ངེས་པའི་སྐྱེས་བུ་ཆེན་པོར་གྲགས་སོ། །

སྐུ་མཆེད་གསུམ་གྱི་རྣམ་པར་ཐར་པ་ནི་ཕྱི་ནས་འཆད་པར་འགྱུར་ལ། རྣལ་འབྱོར་པ་རྣམ་པ་བཞི་ནི། རྣལ་འབྱོར་པ་ཆེན་པོ་བྱང་ཆུབ་རིན་ཆེན། རྣལ་འབྱོར་དགོན་པ་བ་ཆེན་པོ་དབང་ཕྱུག་རྒྱལ་མཚན། རྣལ་འབྱོར་པ་ཤེས་རབ་རྡོ་རྗེ། རྣལ་འབྱོར་ཕྱག་དར་སྟོན་པ་བཞི་སྟེ། དེ་དག་གི་རྣམ་ཐར་ནི་སྔར་ཇོ་བོའི་རྣམ་ཐར་གྱི་སྐབས་སུ་བཤད་པ་ལྟར་རོ། །

གཞན་མ་དགེ་བཤེས་ཀ་བ་ཆེན་པོ། གསང་ཕུ་བ་ལེགས་པའི་ཤེས་རབ། ཡེར་པའི་དགེ་བཤེས་ཇོ་བོ་ལེགས་སོགས་སེམས་དཔའ་ཆེན་པོ་ངོ་མཚར་བསམ་གྱིས་མི་ཁྱབ་པའི་རྣམ་ཐར་དང་ལྡན་པ་མང་དུ་ཡོད་མོད་ཀྱི། ཡི་གེའི་ཁུར་གྱིས་འཇིགས་པས་འདིར་མཐའ་དག་མ་སྤྲོས་སོ། །

དེས་ན་བྱང་ཆུབ་ལམ་རིམ་ལ་བློ་སྦྱོང་བར་འདོད་པ་རྣམས་ཀྱིས། ཐུགས་རྗེ་ཆེན་པོ་རྒྱལ་བ་འབྲོམ་གྱི་རྣམ་ཐར་རྣམས་དྲན་པར་བྱས་ལ། སྐུའི་རྣམ་པ་ཡིད་ཡུལ་དུ་བྱས་ཏེ། ཡང་དང་ཡང་དུ་གསོལ་བ་གདབ་པ་དང༌། ལྷག་པར་ཚེ་འདི་བློས་གཏོང་བ་དང་། མཁའ་ཁྱབ་ཀྱི་སེམས་ཅན་ལ་བྱམས་སྙིང་རྗེ་སྦྱོང་བ་སོགས། འབྲོམ་རིན་པོ་ཆེའི་གསུང་རྣམས་དྲན་པར་བྱས་ལ། ཉིན་རེ་བཞིན་བྱང་ཆུབ་ལམ་གྱི་རིམ་པ་ལ་བག་ཆགས་ཅི་ཐེབས་བྱའོ། །